तेलको मुल्य वढ्दा एकै दिनमा मुल्य वढाउने निगम घट्दा महिनौ दिन देखि चुपचाप

काठमाडौ : अन्तराष्ट्रिय बजारमा थोरै तेलको मुल्य वढ्दा एकै दिनमा मुल्य वढाउने आयल निगम घट्दा महिनौ दिन देखि चुपचाप वसेको छ । पछिल्लो एक महिनामा कच्चा तेलको भाउ २३ प्रतिशतले घटिसकेको छ ।

भाउ घट्न थालेपछि भारतको घरेलु बजारमा पेट्रोल र डिजेल सस्तिएको छ । तर, भारतबाटै तेल खरिद गर्ने नेपाल आयल निगमले दुई महिनाअघिकै मूल्यमा नेपाली उपभोक्तालाई पेट्रोल, डिजेल बिक्री गरिरहेको छ ।

आयल निगमले तेल खरिद गर्दै आएको भारतीय आयल कर्पाेरेसन (आइओसी)ले एक महिनायता हरेक दिन तेलको मूल्य घटाएको छ । यसरी भारतीय बजारमा एक महिनामा २८ दिनसम्म लगातार मूल्य घटेको छ । आइतबार पेट्रोल २० पैसा र डिजेल १८ पैसा भारु प्रतिलिटर घटाएको छ ।

आइओसीले नेपाल पठाउने तेलको मूल्य पनि घटाएको छ । निगमले १५ कात्तिक (१ नोभेम्बर) मा पेट्रोल ६७.९३ रुपैयाँ र डिजेल ७८.०२ रुपैयाँ प्रतिलिटरमा रक्सौल नाकामा खरिद गरेको थियो । ३० कात्तिकमा पेट्रोल ६१.१५ रुपैयाँ र डिजेल ७२.९६ रुपैयाँमा खरिद गरेको छ । यसरी १५ दिनमा पेट्रोल ६.७८ रुपैयाँ र डिजेल ५.०६ रुपैयाँ सस्तोमा निगमले खरिद गरेको छ । तर नेपाली जनतालाई पुरानै दरमा दिएको छ ।

हिजो सोमबार अन्तराष्ट्रिय बजारमा ब्रेन्ट कच्चा तेलको मूल्य ६५.९ डलर प्रतिब्यारेल कायम भएको थियो । डेढ महिनाअघि कच्चा तेलको भाउ ८६.२९ डलर प्रतिब्यारेल थियो । यो अवधिमा भारतीय बजारमा पेट्रोल ६.१२ भारु र डिजेल ४.१३ भारु सस्तिएको हो ।

नेपालमा आयल निगमले आइओसीबाटै तेल किन्ने भएकाले भारतमा मूल्य घटबढ हुँदा नेपाली बजारमा प्रभाव पर्छ । एक महिनामा आइओसीले दुईपटक मूल्य घटाएर पठाइसकेको छ । तर निगमले मूल्य समायोजन गरेको छैन ।

समीप गौतम शिखरन्युज