एमाले–माओवादी केन्द्रको ब्यानर : लेनिन दिवसमै छैन लेनिनको फोटो, कार्यकर्तामा आक्रोश र चर्को नाराबाजी

काठमाडौँ, ९ बैशाख । लेनिन जयन्ती तथा कम्युनिष्ट पार्टी स्थापना दिवसको कार्यक्रम शुरुमै विवादित भएको छ । मञ्चमा टाँगिएको ब्यानरको विषयमा अहिले चर्को नाराबाजी शुरु भएको छ ।

ब्यानरमा कार्ल माक्र्स र लेनिनको फोटो नभएको भन्दै नाराबाजी सुरु भएको छ । पार्टी एकताको घोषणा गर्ने दिनको रुपमा हेरिएको वैशाख ९ को आजको कार्यक्रममा एकताबारे कुनै निर्णय नभए पनि नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल “प्रचण्ड”ले एकताको सन्देश दिने कार्यक्रम रहेको थियो ।

ठूलो संख्यामा रहेका कार्यकर्ताहरु माक्र्स र लेनिनको फोटो नदेखिएपछि नाराबाजीमा उत्रेका हुन् । १२ बजे सुरु हुने भनिएको सो कार्यक्रम १ बजिसक्दा समेत कार्यक्रम सुरु भएको छैन ।

ब्यानरमा कम्युनिस्ट पार्टीका संस्थापक पुष्पलाल, जनताको बहुदलीय जनवादका प्रवर्तक मदन भण्डारी, पहिलो कम्युनिष्ट प्रधानमन्त्री मनमोहन अधिकारीसँग ओली र प्रचण्डको फोटो छ । ब्यानरमा माक्र्स र लेनिन फोटो नभएको भन्दै कार्यकर्ता आक्रोशित भएका हुन् । लेनिन जयन्तीमा आयोजित कार्यक्रममा लेनिनकै तस्बिर नदेखिएपछि आपति जनाएका हुन् ।

कार्यक्रममा शीर्ष नेता उपस्थित छैनन् । कार्यकर्ताहरु ब्यानर हटाउन गएपछि प्रहरीले उनीहरुलाई रोकेको छ । माओवादी केन्द्रको ठाउँमा “माके” लेखेको भन्दै माओवादी केन्द्रका कार्यकर्ता थप आक्रोशित देखिएका छन् । कार्यक्रममा उपस्थित माओवादी केन्द्रका वरिष्ठ नेता तथा मन्त्री वर्षमान पुन “अनन्त” कार्यकर्ता सम्झाउन सक्रिय भए पनि आक्रोश घटेको छैन ।