काठमाडौँको धुलो यसरी गायब पार्दैछ सरकार

राजधानी काठमाडौँ भन्ने बित्तिकै यहाँको धुँवाधुलो, खाल्डाखुल्डी र लामो समयदेखि निर्माणको पर्खाइमा बसिरहेका अस्तव्यस्त सडक सबैको मस्तिष्कमा आउँछ । पैदलयात्री, साइकल वा मोटरसाइकल चलाउनेले त धुँवाधुलाका कारण भोगेको सास्तीको त बयान गरिसाध्य छैन ।

तर केही दिनयता भने पक्कै पनि तपाई हामीले महशुष गर्दै आइरहेकै होला अहिले राजधानी काठमाडौँमा धुलो हराएर गएजस्तै भएको छ । काठमाडौँको धुलो नियन्त्रणका लागि अहिले सरकार निकै लागि परेको छ । महानगरपालिकाले राजधानीका धेरै धुलो उड्ने स्थानहरुमा ब्रुमरको प्रयोग गर्दै धुलो नियन्त्रण गरिरहेको दृश्य अहिले बल्खु, त्रिपुरेश्वर, चक्रपथ, बानेश्वर लगायतका स्थानमा देख्न सकिन्छ ।

चिसो मौसममा धुलोका कारण सर्वसाधारणको स्वास्थ्यमा गम्भिर असर गर्ने भएकाले सडक पखाल्ने र ब्रुमरमार्फत धुलो तान्ने काम भइरहेको महानगरपालिकाको भनाई छ ।

सडक विभागले ३ वटा ब्रुमरको प्रयोगले ३ चरणमा धुलो नियन्त्रण गरिरहेको छ । पहिलो चरणमा ठूलो ब्रुमर प्रयोग गरेर ठूलाखालका फोहोर संकलन गरिन्छ । त्यसपछि ट्रक ब्रुमरको प्रयोगले बाँकी धुलो उठाइन्छ । अन्त्यमा सुपर मसिन प्रयोग गरी सुक्ष्म र कुनाकाप्चामा रहेका धुलो संकलन गरिन्छ ।

दैनिक ३ घण्टाको दरले काठमाडौँका सडक सफा गर्न १५ जना कर्मचारी परिचालन गरिएका छन् । १ घण्टामा अहिले करिब १ किलोमीटर सडकको धुलो ब्रुमरको सहयोगले उठाउने काम भइरहेको छ । ब्रुमर प्रयोग गर्दा सार्वजनिक सवारी आवगमन अवरोध नपुगोस् भनेर विशेष सावधानी अपनाइएको छ ।

काठमाडौँ भित्र धुलो भित्राउने मुख्य कारण कलंकी नागढुंगाको धुलाम्मे र हिलाम्मे सडकलाई मानिन्छ । सडक विभागले त्यहाँको सडकखण्डको निर्माणलाई तिव्रता दिएर धुलो नियन्त्रण चाँडै गर्न मद्दत गरिरहेको छ । यता, मेलम्चीको पानीको पाइप राख्ने कार्य पनि तिव्रताका साथ भइरहेको छ । त्यस्तै धुलो नियन्त्रणकै लागि खाल्डाखुल्डी सडक पुर्ने काम पनि उत्तिकै तदरुकताका साथ भइरहेको सडक विभागले जनाएको छ ।