प्रदेश १ सरकार र अखिल नेपाल फुटबल संघ (एन्फा) बीच सम्झौता

विराटनगर २९ मंसिर।  प्रदेश नं.१ का मुख्यमन्त्री शेरधन राईले प्रदेश सरकारले खेलको क्षेत्रलाई उच्च प्राथमिकतामा राखेको वताउनु भएको छ ।

प्रदेश नं.१, प्रदेश सरकार र अखिल नेपाल फुटवल संघ बीच मुख्यमन्त्री प्रदेश लिग, प्रदेश नं.१ एवं अन्तराष्ट्रिय आमन्त्रण मुख्यमन्त्री कप फुटवल प्रतियोगिता प्रदेश नं.१ आयोजक र संचालन सम्बन्धी सम्झौतामा हस्ताक्षर तथा पत्रकार भेटघाट कार्यक्रममा उनले सो कुरा बताएका हुन्।

प्रदेश १ सरकारले प्रदेश लिग र अन्तर्राष्ट्रिय आमन्त्रण मुख्यमन्त्री कप फुटबल प्रतियोगिताका लागि अखिल नेपाल फुटबल संघ (एन्फा) सँग २ करोड रुपैयाँको सम्झौता गरेको छ ।प्रदेश नं १ का सामाजिक विकास मन्त्री जीवन घिमिरे र एन्फा अध्यक्ष कर्मा छिरिङ शेर्पाबीच शुक्रबार दुई प्रतियोगिताका लागि सम्झौता भएको एन्फाका प्रवक्ता किरण राई र प्रदेश नं १ सामिाजक विकास मन्त्रालयका निमित्त सचिव उपेन्द्र दाहालले संयुक्त रुपमा जारी गरेको विज्ञप्तीमा उल्लेख छ ।

प्रदेश सरकारले बार्षिक रुपमा पहिलो पटक आयोजना हुने प्रदेश नं १ लिगका लागि १ करोड रुपैयाँ र मुख्यमन्त्री कप फुटबल प्रतियोगिताका लागि अर्को १ करोड रुपैयाँ उपलब्ध् गराउने सम्झौता भएको हो । एन्फा र प्रदेश सरकारबीच दुई प्रतियोगिताका लागि पाँच वर्षको लागि सम्झौता भएको बताइएको छ ।

प्रदेश लिगमा प्रदेश नं १ का १४ जिल्लाका फुटबल टोलीले प्रतिस्पर्धा गर्नेछन् । लिगमा पहिलो र दोस्रो हुने टोलीले अन्तर प्रदेश एन्फा प्रेसिडेन्ट्स कपमा भाग लिने पाउनेछन् ।

त्यस्तै प्रदेश सकारको सहयकार्यमा हुने मुख्यमन्त्री कपमा बढीमा १६ टोली सहभागी गराउने सहमति भएको छ । जसमा पल्सर सहिद स्मारक ए डिभिजन लिगको विजेतोदेखि छैटौं स्थान प्राप्त गर्ने क्लब, तीन विदेशी क्लबलाई सहभागि गराइने सहमति भएको एन्फाका प्रवक्ता किरण राई ले बताए।