माइक्रो, बस चढ्दा चनाखो रहनुस्, चोरको बिगबिगी

काठमाडौं । बस, माइक्रो चढ्दा चनाखो हुनुस् । किनभने भिडभाडमा तपाइँको महत्वपूर्ण सामान हराउन सक्छ । काठमाडौंका सार्वजनिक यातायातमा पैसा, मोबाइल, सुनका गहना जस्ता महत्वपूर्ण सामान बोकेर हिड्दा चनाखो हुनुहोला ।

भीडभाडमा हुनहुन्छ भने निकै नै होसियार भएर हिड्नुपर्ने समय आएको छ । राजधानीका सार्वजनिक सवारी साधनमा पाकेटमारको बिगबिगी बढेको छ ।

उपत्यकामा बेग्लाबेग्लै समयमा चल्ने सवारी साधनमा पाकेटमार समूहले सांकेतिक भाषा बोलेर चोरी गर्ने गरेका छन् ।

पकेटमारले पैसालाई ‘द’, मोबाइललाई ‘कान’, प्रहरीलाई ‘ठूल्दाइ’, चालकलाई ‘माम’, सहचालकलाई ‘मले’, गाडीबाट झरेर भागलाई ‘टप्की’लगायतका सांकेतिक शब्द बोल्ने गरेको अनुसन्धानमा खुलेको प्रहरीले जनाएको छ ।

पैसा भएको यात्रुलाई घेराबन्दीमा पारी ठेलमठेल बनाएर यात्रुसँग भएको नगद, मोबाइल तथा गरगहना लुटेको भेटिएको छ । अहिलेसम्म ६ लाख नगद, मोबाइल ३९ थान, आइप्याड ४ थान, ल्यापटप ५ थान प्रहरीले पक्राउ गरेको छ ।

चोरहरु बढेपछि मंसिर १५ देखि महानगरीय प्रहरी परिसरले नेपाल यातायात व्यवसायी राष्ट्रिय महासंघसँग मिलेर सादा पोशाकमा प्रहरी खटाएको थियो । प्रहरी खटिएपनि सार्वजनिक सवारी साधनमा हिड्दा चनाखो भएर हिड्नुपर्नेछ । विभिन्न सडकमा चल्ने सार्वजनिक यातायातमा सादा पोशाक लगाएका प्रहरीसमेत खटिएका छन् । तर, चोरी नियन्त्रण हुन सकेको छैन ।

अभियान अन्तरगत परिसरले ५० जना प्रहरीलाई चक्रपथ, रत्नपार्क, जमल, कालीमाटी सहितका उपत्यकाका विभिन्न क्षेत्रमा सादा पोशाकमा खटाएको थियो । बस तथा माइक्रोबसमा चढेका यात्रुको पकेट, झोलामा राखेको पैसा, मोबाइल लगाएका गहना चोर्ने ७७ जनालाई प्रहरीले पक्राउ गरिसकेको छ ।

सार्वजनिक बसमा विभिन्न बस स्टपमा दुईदुई जनाको दरले ६ जनासम्म चढ्ने र पैसा भएको यात्रु चिनेर पकेट मार्ने गरेको प्रहरीले अनुसन्धानमा भेटेको छ ।