अनौपचारिक छलफलमा कांग्रेस

काठमाडौं, २३ मंसिर । नेपाली कांग्रेसले संशोधित विधान मस्यौदामा सहमति जुटाउन आजदेखि अनौपचारिक छलफल शुरु गर्दैछ । पार्टी केन्द्रिय कार्यालय सानेपामा १० दिनसम्म केन्द्रीय समिति बैठकमा छलफल गरेको कांग्रेसले अनौपचारिक रुपमा मस्यौदामा सहमती जुटाउने प्रयास थालेको हो ।

कांग्रेसको विधान मस्यौदामा पदाधिकारी संख्या र सभापतिको अधिकार क्षेत्रका बिषयमा विवाद कायम छ । संस्थापन पक्ष पदाधिकारी संख्यालाई समावेशी तवरले बढाउनुपर्ने र सभापतिको अधिकारलाई खुम्च्याउन नमिल्ने पक्षमा रहेको छ । संस्थापन ईतरको पक्ष पदाधिकारीलाई निर्वाचनका माध्यमबाट अधिकार सम्पन्न बनाउनुपर्ने र सभापतिको अधिकार १५ प्रतिशतमा झार्नुपर्ने पक्षमा उभिएको छ ।

विधानका विवादित बिषयमा आजको अनौपचारिक बैठक मार्फत् सहमति खोजिने र भोलिका लागि केन्द्रीय कार्य समिति बोलाइएको कांग्रेस नेता मीन विश्वकर्माले जानकारी दिए । उनले विधानका अन्य बिषयमा छलफल टुंगिएको बताउँदै पदाधिकारी संख्यामा बैठक अड्किएको दाबी गरे ।अनौपचारिक छलफलका माध्यमबाट सबै बिषयमाथि सहमति जुटाइने नेताहरुले बताएका छन् ।