अमेरिकी सेनामा टिकटक प्रतिबन्धित

काठमाडौं, पुस २१ । अमेरिकी सेनाले सिपाहीहरूलाई प्रदान गरेको स्मार्टफोनमा टिकटक नचल्ने बनाइएको छ । यसभन्दा अगाडी अमेरिकी नेभीले पनि टिकटक माथि प्रतिबन्ध लगाएको थियो ।

अमेरिकी सेनाले टिकटकलाई साइबर थ्रेट अर्थात् जोखिमको रुपमा लिएको छ । गत महिनाको बीचबाट नै अमेरिकी सेनाका सिपाहीहरूलाई यस प्रतिबन्धको बारेमा जानकारी गराउंदै आईएको थियो ।

टिकटकको मुख्य कम्पनी बाइटडान्स चाइनिज कम्पनी रहेको र उक्त कम्पनीले अमेरिकाको साइबर सुरक्षामा असर गर्न सक्ने भएकाले नै अमेरिकी नेभी र अमेरिकी सेनाले सिपाहीहरूको स्मार्टफोनहरूमा टिकटक ब्यान गरेको हो । बाइटडान्सले अमेरिकी सेनाको जानकारी चोरी गरेर चिनियाँ सरकारलाई प्रदान गर्न सक्ने जोखिम रहेकोले नै टिकटकलाई प्रतिबन्ध गरिएको हो भन्ने कुरा मिलिटरी डट कममा उल्लेख गरिएको छ ।

सिपाहीहरूलाई अमेरिकी सेनाहरू द्वारा प्रदान गरिएका स्मार्टफोनहरूमा मात्र टिकटक प्रतिबन्धित हुनेछ । तर सिपाहीहरूले आफ्नो व्यक्तिगत स्मार्टफोनमा टिकटक प्रयोग गर्न पाउनेछन् ।एजेन्सी