उदयपुरमा ३ व्यक्ति पक्राउ, ठूलो परिमाणमा लागूऔषध बरामद

अस्बिन खड्का

उदयपुर, २१ चैत । उदयपुर जिल्लाको प्रवेशद्वारको रुपमा रहेको त्रियुगा नगरपालिकाको वडा नं– ६ लालपत्ताबाट जिल्ला प्रहरी कार्यालय उदयपुरबाट सादा पोशाकमा खटिएको प्रहरीले जिल्लामा हालसम्मकै सबैभन्दा धेरै परिणामको लागुऔषध बरामद गरेको छ । आज दिउँसो २ बजेतिर लागुऔषध ओसारपसारमा संलग्न ३ जनालाई पक्राउ गर्नुका साथै लागूऔषध बरामद गरिएको हो ।

पक्राउ पर्नेहरुमा त्रियुगा नगरपालिका– ६ लालपत्ताका २० वर्षीय अनिश खडका, २१ वर्षीय सञ्जीव खडका र २३ वर्षीय प्रकाश खड्का रहेको प्रहरी निरीक्षक टेकेन्द्र पौडेलले जानकारी दिए । उनीहरुलाई सप्तरी जिल्लाको कदमाहाबाट गाईघाटतर्फ आइरहेको अवस्थामा सादा पोशाकमा खटिएको प्र.स.नि. इन्द्र श्रेष्ठसहित ३ जनाको टोलीले पक्राउ गरेको हो । उनीहरुमाथि शंका लागेर मोटरसाइकल रोकी खानतलासी गर्दा अवैध लागुऔषध डाईजेलाब ३०० एम्पुल, फेनरागन २९८, एम्पुल, नुफिन २९९ एम्पुल गरी जम्मा ८९७ एम्पुल र नाईटेभेट गोटी २० पत्ता गरी जम्मा ३०० पीससहित स्टिकरहरु समेत बरामद गरिएको छ । उनीहरुलाई स.६.प. २०७६ नम्बरको मोटरसाइकलसहित पक्राउ गरिएको हो ।

जिल्ला प्रहरी कार्यालय उदयपुरका प्रहरी प्रमुख एसपी नवराज भट्टका अनुसार बरामद भएको लागुऔषधको मूल्य अनुमानित ३ लाखभन्दा बढी रहेको छ । “यो अहिलेसम्मको बरामद लागुऔषधको सबैभन्दा ठूलो परिमाण हो”, एसपी भट्टले भने, “यसमा ठूलो गिरोह नै सक्रिय भएर लागिरहेको देखिएको छ । अब थप अनुसन्धानमार्फत सम्बन्धित सबै कुराको अनुसन्धान गरी अपराधी पक्राउ गर्ने दिशामा हामी अगाडि बढ्छौं ।”