एमालेले प्रदेश-६ को उम्मेदवार टुङ्यायो, कस कसले पाए टिकट ?
सारांश
- काठमाडौं, १५ कार्तिक ।
- एमालेले प्रदेश नम्बर ६ को दोस्रो चरणमा चुनाव हुने तीन जिल्लाको प्रतिनिधिसभा तथा प्रदेशसभामा प्रत्यक्षका उम्मेदवारहरुको टुङ्गो लगाएको छ।
- तीन जिल्लाको पाँच प्रतिनिधिसभा मध्ये एमालेले चार र नेकपा माओवादी केन्द्रले एक सीट प्राप्त गरेको छ।
काठमाडौं, १५ कार्तिक । एमालेले प्रदेश नम्बर ६ को दोस्रो चरणमा चुनाव हुने तीन जिल्लाको प्रतिनिधिसभा तथा प्रदेशसभामा प्रत्यक्षका उम्मेदवारहरुको टुङ्गो लगाएको छ।
तीन जिल्लाको पाँच प्रतिनिधिसभा मध्ये एमालेले चार र नेकपा माओवादी केन्द्रले एक सीट प्राप्त गरेको छ।
प्रदेशसभा दस स्थानमा एमालेले ६ र माओवादी केन्द्रले चार स्थान प्राप्त गरेको थियो । सल्यानको प्रतिनिधिसभाको अतिरिक्त माओवादीले प्रदेशसभामा सुर्खेतमा दुई र दैलेखमा एक स्थान प्राप्त गरेको छ । सल्यानमा आफूले प्राप्त गरेको प्रतिनिधिसभामा माओवादीले विना विभागीय मन्त्री टेकबहादुर बस्नेतलाई उम्मेदवार बनाउँदैछ।
एमाले स्थायी कमिटीको मंगलबार राति बसेको बैठकले सुर्खेत-१ बाट ध्रुवबहादुर शाही र सुर्खेत-२ बाट नवराज रावत र दैलेख-१ बाट रविन्द्र शर्मा र दैलेख -२ बाट राजबहादुर बुढालाई उम्मेदवार बनाउने निर्णय गरेको छ ।
साविकको भेरी र कर्णाली अञ्चलका जिल्लाहरुलाई समेटेर बनेको यो प्रदेशमा पहिलो चरणमा पश्चिम रुकुम, जाजरकोट, हुम्ला, जुम्ला, मुगु, कालिकोट र डोल्पामा पहिलो चरणमा चुनाव हुँदैछ।
मुख्यमन्त्रीमा प्रतिस्पर्धी थपिए
माओवादीसँग चुनावी तालमेलको कारण समितिका पूर्व सभापति प्रकाश ज्वाला प्रदेशसभामा सल्यान (ख)को उम्मेदवार बनेपछि प्रदेश-६को मुख्यमन्त्रीको दौड रोमाञ्चक बनेको छ । एमालेका पोलिटब्युरो सदस्य रहेका ज्वालाले प्रतिनिधिसभाको उम्मेदवार बन्ने जोड रहेको थियो । तर सीटको बाँडफाँट हुँदा उनको क्षेत्र माओवादी केन्द्रको भागमा पर्यो जसको कारण उनी प्रदेशसभाबाट चुनाव लड्ने भए ।
यसअघिनै माओवादीका विना विभागिय मन्त्री महेन्द्रबहादुर शाही मुख्यमन्त्री बन्ने भन्दै प्रदेशसभाबाट प्रतिस्पर्धामा रहेका छन्। पार्टीलाई प्रतिनिधिसभाकै टिकट दिएपनि उनले अन्तिम समयमा प्रदेशसभा रोजेका थिए ।
एमालेकै अर्को पोलिटब्युरो सदस्य यमलाल कँडेल पनि मुख्यमन्त्रीका आकाक्षी हुन्। उनले सुर्खेत-२ (ख) निर्वाचन क्षेत्रबाट उम्मेदवार बनेका छन्।
एमालेका उम्मेदवारहरु
प्रतिनिधिसभातर्फ
सुर्खेत – १ ध्रुवबहादुर शाही
सुर्खेत – २ नवराज रावत
दैलेख – १ रविन्द्र शर्मा
दैलेख – २ राजबहादुर बुढा
प्रदेशसभातर्फ
सल्यान(क)- गुलावजंग शाह
सल्यान (ख) प्रकाश ज्वाला
सुर्खेत १(क) खड्ग खत्री
सुर्खेत २ (ख) यमलाल कँडेल
दैलेख-१ (ख)- अमर थापा
दैलेख २ (क) सुशील थापा
दैलेख २ (ख) राजबहादुर शाही
प्रतिक्रिया