एमाले–माओवादीभित्र गुट–उपगुट छ त्यसको अन्त्य गर्छौं : नेता श्रेष्ठ

काठमाडौं, १३ माघ । नेकपा माओवादी केन्द्रका नेता नारायणकाजी श्रेष्ठले एमाले–माओवादीभित्र गुट–उपगुट रहेको र त्यसको अन्त्य गर्ने बताएका छन् ।

शनिबार गोरखा सदरमुकामस्थित एमाले पार्टी कार्यालयमा दुवै पार्टीका कार्यकर्ताहरूसँग संयूक्त रूपमा चुनावी समीक्षा गर्दै श्रेष्ठले यस्तो बताएका हुन् ।

उनले विभिन्न संगठनको समायोजन कसरी गर्ने भन्ने तयारीमा दुवै पार्टीभित्र छलफल भएको बताए । सरकार गठन पहिले नै श्रेष्ठले एमालेसँग पार्टी एकता हुने विश्वास दिए ।

‘फागुनमा नयाँ सरकार बनाउने तयारी त छँदैछ । गोरखालाई लालकिल्ला त बनाउन त सकिएन । तर संघीय सरकार र प्रादेशिक सरकार वाम गठबन्धनकै बन्ने पक्का छ’, उनले भने, ‘म पार्टी एकता संयोजन समितिको पनि भएकोले के भन्छु भने फागुनमा दुई पार्टीको एकता भएको घोषणा गरेर सरकार गठन प्रक्रियाका साथ हामी गृहकार्य गरिरहेका छौँ ।’

उनले पार्टी एक हुन नदिन र भाँड्न विभिन्न शक्तिहरूले लागेको बताए । ‘हामी एक हुन नदिन यसलाई भत्काउन, भाँड्न विभिन्न शक्तिहरू लागि परेका छन् । तर हामी पार्टी एक गरेरै शहिद र जनताको सपना पूरा गरेर समृद्ध नेपाल बनाउने नै छौँ’ श्रेष्ठले भने ।