कक्षा ११ को मौका परीक्षाको रिजल्ट आयो

काठमाडौं, १३ फागुन- राष्ट्रिय परीक्षा बोर्डले कक्षा ११ को मौका परीक्षाको परीक्षाफल प्रकाशित गरेको छ । बोर्डले शनिबार सार्वजनिक गरेको परीक्षा फलमा ७६.९१ प्रतिशतले आफ्नो ग्रेड वृद्धि गरेका छन् । ३९ हजार ९ सय ९० जना सहभागी विद्यार्थीमा ४ हजार १ सय ६९ जना अनुपस्थित थिए भने एकजनाको परीक्षामा अमर्यादित गतिविधि गरेको भन्दै निस्कासन गरिएको थियो ।

बोर्डका अध्यक्ष प्रा.डा. चन्द्रमणि पौडेलका अनुसार ग्रेड ए प्लस ल्याउने १२, एमा १८२, बी प्लस एक हजार ८५ छन् । त्यसैगरी बी ४ हजार ६ सय ९६, सी प्लस १ हजार ४६, सी १४ हजार ७३६, डी प्लस ५ हजार ५ सय ६५, डी २ हजार ५ सय ४ र ई ग्रेड ल्याउने १ हजार १६६ रहेका छन् ।

बोर्डले २९ पुसमा पहिलोपटक कक्षा ११ को नतिजा लेटर ग्रेडिङमा सार्वजनिक गरेको थियो । सबै विषयमा डी प्लस ल्याएर एउटा विषयमा मात्र अनुपस्थित भएको तथा त्यसभन्दा तल्लो ग्रेड प्राप्त गरेका विद्यार्थीलाई मौका परीक्षाको व्यवस्था गरेको थियो । डी प्लस, डी, र इ ग्रेड ल्याएकाले मौका परीक्षामा सहभागी भएका थिए ।