सुन्धाराको डान्सबारमा काम गर्ने युवतीको रहस्यमय मृत्यु

काठमाडौं, ११ भदौ । काठमाडौंको सुन्धारामा रहेको रोयल ग्यालेक्सी डाक्स बारमा काम गर्ने एक युवतीको रहस्यमय मृत्यु भएको छ । तारकेश्वर नगरपालिकाको शेषमतीमा बस्दै आएकी २० वर्षीया जेनिशा भनेर बोलाइने कोपिला श्रेष्ठको आइतबार राति मृत्यु भएको हो ।

उक्त घटनामा संलग्न भएको आशंकामा प्रहरीले कोपिलाका प्रेमी सागर कार्कीलाई पक्राउ गरेको छ । महागनरीय प्रहरी वृत्त, बालाजुका डिएसपी चिरञ्जीवी कोइरालाले उनलाई पक्राउ गरिएको र थप अनुसन्धान भइरहेको बताए । डान्स बारमै चिनजान भएर नजिकिएका उनीहरु नियमित भेटघाट गरिरहन्थे । आइतबार उनीहरु युवतीकै डेरामा थिए ।

प्रहरीलाई युवकले दिएको बयान अनुसार उनीहरुले दिनभर मदिरा पिएका थिए । “साँझ म ट्वाइलेटमा गएको बेला ऊ सलको पासो लाएर झुण्डिछ, मैले देख्ने बित्तिकै निकालेर अस्पताल लगेको हुँ” युवकले दिएको बयानलाई उद्धृत गर्दै प्रहरीले भन्यो । यद्यपि, प्रहरीले युवकको बयानलाई विश्वास गर्न सकेको छैन ।

त्रिभुवन विश्वविद्यालय शिक्षण अस्पतालमा युवतीको मृत्यु भएको थियो । कुनै विवादमा उनको हत्या भएको हुनसक्ने प्रहरीको आशंका छ । तर, युवतीको पोष्टमार्टम रिपोर्ट आएपछि मात्रै निक्र्यौल हुने डिएसपी कोइरालाले बताए । पक्राउ परेका कार्कीमाथि मंगलबार म्याद थप गरेर विस्तृत अनुसन्धान थालिने प्रहरीले जनाएको छ ।