कहाँ बन्ला वैकल्पिक विमानस्थल!

काठमाडौं, २६ वैशाख- त्रिभुवन विमानस्थलमा देखिएको चापका कारण संस्कृति, पर्यटन तथा नागरिक उड्डयन मन्त्री रबिन्द्र अधिकारी वैकल्पिक विमानस्थलको खोजीमा छन् ।

हवाई चापलाई कम गर्न र एकमात्र विमानस्थलले काम नदिएको भन्दै उनी एक टोलीसँग काभ्रेको नागीडाँडा, ठूलीचौरको अध्ययन गरी फर्केका थिए ।

मन्त्री अधिकारीसहित काभ्रेका जनप्रतिनिधि, वायुयान सञ्चालक, विमानस्थल निर्माण र सञ्चालन गर्ने निकाय नागरिक उड्डयन प्राधिकरणका कर्मचारी, सञ्चारकर्मी पनि पुगेका थिए । टोलीले बनेपा नगरपालिकाभित्रको नागीडाँडा, धुलिखेल नगरपालिकामा पर्ने ठूलीचौरको स्थलगत अवलोकन गरी फर्केको थियो ।

काठमाडौंबाट सबैभन्दा नजिकको स्थान नागीडाँडा पर्छ । जसको जम्मा दूरी २५ किलोमिटर छ ।
एक महिना अघि मलेशिया हिडेको मालिंगो जहाज धावनमार्गबाट चिप्लिँदा १८ घण्टा उडान र आवागमन ठप्प भएको थियो । सानो समस्याका कारण पनि त्रिभुवन विमानस्थल बन्द गर्नुपर्दा यात्रुहरुले निकै सास्ती भोगिरहेका छन् ।