काठमाडौंमा आइपुगे यी विशिष्ट पाहुना, आजदेखि एशिया प्यासिफिक समिट

काठमाडौं । काठमाडौंमा आज शनिबारदेखि ‘एसिया प्यासफिक समिट–२०१८’ शुरु हुँदैछ । सम्मेलनमा भाग लिन उच्च विशिष्ट पाहुना काठमाडौं आइसकेका छन् ।

कार्यक्रमको प्रधानमन्त्री केपी शर्मा ओलीले उद्घाटन गर्दैछन् । कार्यक्रममा सहभागी हुन सात देशका अति विशिष्टसहित उच्चपदस्थ पाहुना आइसकेका छन् । कतिपय देशका प्रमुख आज आउने कार्यक्रम छ ।

कार्यक्रमको आयोजक युनिभर्सल पिस फेडेरेसनका अनुसार कार्यक्रममा भाग लिन कम्बोडियाका प्रधानमन्त्री हुन सेन, म्यानमारकी स्टेट काउन्सिलर आङ साङ सुकी सबैभन्दा अगाडि काठमाडौं आएका हुन् ।

सम्मेलनमा भारत, पाकिस्तानका पूर्वप्रधानमन्त्री, लाओसबाट नेसनल एसेम्बली प्रमुख, फिजीका संसद् प्रमुख काठमाडौंमा छन्। कार्यक्रममा ४५ देशका १५ सयजना सहभागिता हुने बताइएको छ । अन्य देशका मुलुकका अति विशिष्ट, पाहुनासमेत हिजो बेलुका आइपुगेको आयोजकले जानकारी दिएको छ ।

कार्यक्रममा तायरोका प्रधानमन्त्री, सामोहका राजा, तुभालुका राष्ट्रप्रमुख लाकोबा तेइआ इटालेनी, नौरुका राष्ट्रपति बारोन वाका, फिलिपिन्सका उपराष्ट्रपति मारिया लियोनर रोब्रेडोलगायतकाका अतिविशिष्ट पाहुना काठमाडौं आइसकेका छन् ।

कार्यक्रममा आउनेलाई सरकार प्रमुख तथा राष्ट्रप्रमुखलाई सोल्टी क्राउन प्लाजामा खाने, बस्ने मिलाइएको छ । त्यसैगरी पूर्व सरकार प्रमुख, राष्ट्रप्रमुख, सभामुखलाई द्वारिका होटलमा बस्ने व्यवस्था मिलाइएको आयोजकले जनाएको छ। भारतीय प्रतिनिधिमण्डललाई होटल याक एन्ड यतीमा बस्ने व्यवस्था छ।