काठमाडौं-रक्सौल रेलमार्ग अध्ययन यसरी शुरु भयो

शिखरन्युज, २७ जेठ – काठमाडौं-रक्सौल रेलमार्ग अध्ययन गर्न भारतीय रेल विभागका कर्मचारी काठमाडौं आएर काम शुरु गरेका छन् । चीन तर्फबाट काठमाडौंसम्म रेल ल्याउने चर्चा चलिरहेका बेला भारतबाट काठमाडौं जोड्ने रेलका लागि अध्ययन शुरु भएको हो ।

प्रधानमन्त्री केपी शर्मा ओली भारत भ्रमण गएका बेला रेलमार्ग बनाउने सम्झौता भएको थियो । सम्झौता अनुसार प्रारम्भिक सर्भे गरी प्रारम्भिक लागतको खाका तयार गर्ने बताइएको छ । रेल विभागका अनुसार अबको ४ महिनाभित्र प्रारम्भिक प्रतिवेदन तयार गर्ने कार्ययोजनासहित भारतीय रेल विभाग अन्तर्गतका वरिष्ठ इन्जिनियर काठमाडौं आएर काम सुरु गरिसकेका छन् ।

प्रतिवेदनकै आधारमा विस्तृत परियोजना प्रतिवेदन बनाइने रेल विभाग काठमाडौंले जनाएको छ।
भारतीय प्रधानमन्त्री नरेन्द्र मोदी नेपाल भ्रमणमा रहँदा उनीसँगै आएका दुईजना वरिष्ठ इन्जिनियरले सम्भावित रेल स्टेसनको रूपमा काठमाडौंको चोभार पुगी स्थलगत हेरेर फर्केका थिए । चोभार पुगेर हेरपछि त्यतिबेलै रेलमार्ग अध्ययनको नक्सा समेत लिएर गएको बताइएको छ । 

नेपालका रेल विभागका महानिर्देशक अनन्त आचार्यका अनुसार भारीय इन्जिनियरहरू अहिले प्रतिवेदन तयार पार्न काठमाडौं आएका हुन् । उनका अनुसार भारतको रेल मन्त्रालयको आदेश अनुसार ४ महिनाभित्र प्रतिवेदन बुझाउनुपर्नेछ । त्यस्तो अध्ययन प्रतिवेदन तयार भएपछि रेलमार्ग बनाउन लाग्ने लागतको अनुमानसहितको विस्तृत परियोजना प्रतिवेदनका लागि काम शुरु गरिनेछ ।