कात्तिक महिनाभित्रै समाजवादी पार्टी सरकारबाट बाहिरिने

काठमाडौं। संविधान संशोधनसहित तीन बुँदे सहमति गरेर सरकारमा सहभागी भएको समाजवादी पार्टी यही महिनाभित्रै सरकारबाट बाहिरिने तयारी गरेको छ। आफूहरुसँग भएको सहमति कार्यान्वयन गर्न नसकेको, सरकारले कामको गति लिन नसकेको भन्दै लगातार सरकारको आलोचना गर्दै आएको समाजवादी पार्टीले यही महिनाभित्र सरकारबाट बाहिरिने तयारी गरेको हो।

राजपासँग एकताको तयारी गरेको समाजवादी पार्टीले सरकारबाट बाहिरिने निर्णय गर्न केन्द्रीय समितिको बैठकसमेत बोलाएको छ। स्रोतका अनुसार राजपाले एकताका लागि मुख्य रुपमा सरकारबाट बाहिरिनुपर्ने शर्त राखेपछि समाजवादी पार्टी सरकारबाट बाहिरिन तयार भएको हो।
विशेष गरी नयाँ शक्ति पार्टीसँग एकतागरेपछि उपेन्द्र यादवमाथि सरकारबाट बाहिरिनु पर्ने दबाव छ। राजपाले पनि सरकारबाट नबाहिरिएसम्म एकता नहुने अडान लिएपछि समाजवादी पार्टी सरकारबाट बाहिरिने सोचमा पुगेको स्रोतले दाबी गर्यो।

‘सरकारमा सहभागी हुँदा भएको तीन बुँदे सहमति कार्यान्वयनप्रति सरकारले चासो देखाएन,’ स्रोतले भन्यो, ‘अहिलेकै अवस्थमा सरकारमा बसिरहँदा फाइदा भन्दा बढी घाटा हुने देखिएपछि सरकारबाट बाहिरिने सोचमा पार्टी पुगेको हो।’ यसअघि नै बाहिरै बसेर सरकारलाई समर्थन गरेको राजपाले सरकारलाई दिएको समर्थन फिर्ता लिइसकेको छ। यदि समाजवादी पार्टीपनि सरकारबाट बाहिरियो भने ओली सरकारले ‘दुई तिहाइ’ बहुमत गुमाउनेछ। समाजवादी सरकारमा रहेका कारण मात्रै ओली सरकारसँग दुई तिहाइ बहुमत पुगेको हो। यद्यपी समाजवादी पार्टी सरकारबाट बाहिरिए पनि सरकारलाई तात्विक असर भने पर्ने छैन। किनभने नेकपासँग स्पष्ट बहुमत रहेको छ।