मर्यादित पत्रकारिताका नाममा मिडियामाथि हुने कुनै पनि नियन्त्रण अमान्य: पोख्रेल

काठमाडौं, ८ जेठ । नेपाल पत्रकार महासंघका कार्यवाहक अध्यक्ष विपुल पोख्रेलले मर्यादित पत्रकारिताका नाममा मिडियामा हुने कुनै पनि खालको नियन्त्रण मान्य नहुने बताएका छन् ।

सरकारको नीति तथा कार्यक्रममा मिडियालाई मर्यादित र जिम्मेवार बनाइने उल्लेख गरिएकोमा नेपाल पत्रकार महासंघमा आज आयोजित कार्यक्रममा कार्यबाहक अध्यक्ष पोख्रेलले त्यसलाई प्रष्ट पार्न सरकारलाई आग्रह गरे । “सहजीकरणका लागि उल्लेख गरिएको हो भने ठीक छ”, कार्यवाहक अध्यक्ष पोख्रेलले भने, “तर नियन्त्रण गर्ने आशय भए मान्य हुँदैन ।”

महासंघका निवर्तमान अध्यक्ष डा. महेन्द्र विष्टले कानूनीरुपमै सञ्चारमाध्यममाथि नियन्त्रण गर्ने प्रवृत्ति विश्वव्यपीरुपमा बढिरहेको भन्दै नेपालमा त्यसको सम्भावना तत्काल नभए पनि सचेत रहन आवश्यक रहेको धारणा व्यक्त गरे ।

पत्रकार महासंघका सल्लाहकार तीर्थ कोइरालाले मिडियामा पेशागत असुरक्षा र स्वनियन्त्रण रहेको भन्दै पत्रकारिता क्षेत्रमा रहेका कमजोरीलाई न्यूनीकरण गर्न पत्रकारलाई पनि सचेत गराउनुपर्ने बताए ।

न्यूनतम पारिश्रमिक निर्धारण समितिका अध्यक्ष गंगाधर पराजुलीले मिडियामा पेशागत असुरक्षा भएपनि समितिमा उजुरी भने कम आउने गरेको बताए ।

राष्ट्रिय मानवअधिकार आयोगका सूचना अधिकारी डा. टीकाराम पोखरेलले मिडिया राष्ट्रिय मानवअधिकार आयोगको सहयोगीका रुपमा रहेको भन्दै मिडियामा आएपछि नै धेरैजसो घटनाको अनुसन्धान गर्ने बताए ।

प्रेस काउन्सिलका सूचना अधिकारी दीपक खनालले आचासंहिता उल्लंघनका घटनाहरु बढिरहेको भन्दै सबैभन्दा बढी उजुरी अनलाइनबारे परेको बताए । अहिलेसम्म एक सय उजुरी परेको जानकारी दिँदै उनले त्यसमध्ये ६० वटा अनलाइन सम्बन्धी भएको बताए । सूचना अधिकारी खनालले कतिपय अवस्थामा पत्रकारहरुले जानेरै आचारसंहिता उल्लङ्घन गर्ने गरेको बताए ।