‘कान्छी’ को ‘चरी चट्ट परी…’ को भिडियो रिलिज ।
सारांश
- नायिका श्वेता खड्काले बनाएको फिल्म ‘कान्छी’ को बिहीबार नयाँ गीत ‘चरी चट्ट परी…’ को भिडियो रिलिज गरिएको छ ।
- राजनराज सिवाकोटीको रचना तथा संगीत रहेको उक्त गीत सिवाकोटीले अञ्जु पन्तसँग मिलेर गाएका हुन् ।
- गीतमा दयाहाङ राई र श्वेतासहित अर्का कलाकार प्रज्ज्वल सुजल गिरी पनि फिचरिङ छन् ।
दयाहाङ नृत्यमा सहज महसुस गर्दैनन् । नाच्न नरुचाउने उनलाई यसपटक कोरियोग्राफर वसन्त श्रेष्ठले पूरा गीतमा नचाएका छन् । ‘मलाई भिरालो मैदानका कारण नाच्न अलिक गाह्रो भयो,’ दयाहाङले ‘नाच्न नजान्ने आँगन टेढो’ उखानलाई नै मिल्ने गरी आफैंलाई उडाउँदै भने, ‘अरूले फाइटमा रगत निकाल्छन्, मैले नाच्ने क्रममा श्वेतालाई नै निकाल्दिएँ ।’
श्वेताले भने दयाहाङको अभिनयबाट प्रभावित रहेको बताइन् । ‘उहाँसँगै स्क्रिन सेयर गर्न पाउँदा खुसी छु,’ उनले भनिन् । त्यसो त दयाहाङले पनि समकक्षीसँग थुप्रै फिल्ममा काम गरे पनि यसपटक नीर शाहजस्ता वरिष्ठ कलाकारदेखि निर्देशक आकाश अधिकारीसम्मसँग काम गर्ने अवसर जुराइदिएकामा श्वेतालाई धन्यवाद दिए । उनले खास गरी आफूलाई नचाइदिने कोरियोग्राफर श्रेष्ठप्रति खुसी व्यक्त गरे ।
कार्यक्रममा ३३ वर्षअघि निर्मित ‘कान्छी’ का जोडी शिव श्रेष्ठ र शर्मिला मल्ललाई नयाँ ‘कान्छी’ टिमले सम्मान गर्यो । यम थापाको लेखन रहेको फिल्ममा आशान्त शर्मा, अनु शाह, कामेश्वर चौरासिया, विनोद न्यौपाने, रमेश अधिकारी, जयनन्द लामाको अभिनय छ ।
प्रतिक्रिया