केशव स्थापितले विद्यासुन्दरलाई काँधमा बोके !

काठमाडौं, २५ बैशाख– चुनावी घरदैलो कार्यक्रमबाट काठमाडौं महानगरमा एमाले उम्मेदवारहरुको टोली निर्वाचन सम्पर्क कार्यालय कान्तिपथ फर्कंदै थियो । टोलीमा एमाले स्थायी समिति सदस्य शंकर पोखरेल, महानगर मेयरका उम्मेदवार विद्यासुन्दर शाक्य, पूर्व मेयर केशव स्थापित, एमाले नेताहरु जीवनराम श्रेष्ठ, वसन्त मानन्धर लगायत थिए ।

बाटोमा भेटिएकाहरु काठमाडौंका चर्चित पूर्वमेयर केशव स्थापितलाई देखेर झुम्मिए । उनीहरुको भीड नजिकै आएपछि स्थापितले काठमाडौं महानगरमा आफूले थालेका काम अघि बढाउने जिम्मेवारी विद्यासुन्दर शाक्यको भएको वताए । बटुवाहरुले स्थापितलाई प्रश्न गरे– तपाईंले मन भित्रैदेखि विद्यासुन्दरलाई समर्थन गर्नु भएको हो ?
अनि जवाफ दिने पालो आयो स्थापितको । उनले महानगरमा आफूले केही नयाँ काम थालनी गरेको र त्यो राम्रोसँग अघि बढ्न नसकेको वताउँदै उक्त काम पूरा गर्न विद्यासुन्दर शाक्यलाई अघि सारेको वताए । नजिकै रहेका मेयरका उम्मेदवार विद्यासुन्दरलाई स्थापितले काँधमा बोकेर भने– ‘अहिले म विद्यासुन्दरलाई काँधमा बोक्छु, पछि काठमाडौं महानगरलाई विद्यासुन्दरले काँधमा बोक्नुहुन्छ । हामी मिलेर काठमाडौं बनाउन लागेका छौं ।’ स्थापितले शाक्यलाई काँधमा बोकेपछि वरिपरीका सबैले ताली वजाए ।