के गर्दैछन् सिके राउत आजभोली ?

स्वतन्त्र मधेस गठबन्धनको नेतृत्व गरेका सिके राउत र सरकारबीच गत फागुन २४ गते ११ बुँदे सहमति भयो। यो सहमतिसँगै मधेसलाई अलग्गै देश बनाउन अभियान चलाएका राउत खुला राजनीतिमा पदापर्ण भए। राष्ट्रियताको खतराको रुपमा हेरिएका राउत खुला राजनीतिमा आएसँगै त्यसलाई सरकारले आफ्नो ठूलो सफलताका रुपमा व्याख्या गर्यो। हुन पनि मुलुक टुक्राउने अभियान चलाइरहेका राउत मुलुकको संविधानलाई स्वीकार गर्दै खुला राजनीतिमा आउनेलाई सबैले सकारात्मक रुपम नै लिएका छन्।

सरकारसँग ११ बुँदे सहमति गरेर खुला राजनीतिमा आएका राउतले पछिल्लो समय निर्वाचन आयोगमा दल दर्ता गरेर संगठन निर्माणमा लागेका छन्। राउत नेतृत्वको जनमत पार्टी जेठ ६ गते निर्वाचन आयोगमा वैधानिक रुपमा दर्ता भएको थियो। खुला राजनीतिमा आएपछि सिके राउतसहित कार्यसमितिका ३५ जनाले गत १५ वैशाखमा आयोगमा पुगेर दल दर्ताका लागि निवेदन दिएका थिए।

निर्वाचन आयोगमा विधिवत दर्ता भएपनि राउत नेतृत्वमा जनमत पार्टी अहिले संगठन निर्माणमा जुटेको छ। विशेष गरी तराईका जिल्लालाई मुख्य कर्मभूमि बनाउँदै राजनीति गर्दै आएका राउतले आगामी निर्वाचनमा तराइको पहिलो पार्टी बन्ने गरी संगठन निर्माण गरिरहेका छन्। दुई नम्बर प्रदेशमा मधेस केन्द्रित दलको टाउको दुखाइ बनेका राउत निर्वाचनमार्फत पहिलो दल बन्ने गरी संगठन निर्माणमा लागेको सो पार्टीले जनाएको छ।

पछिल्लो समय ओली सरकारका समर्थक जस्तो देखिने राउत दुई नम्बर प्रदेशका युवामाझ निकै लोकप्रिय छन्। खुला राजनीतिमा आएपछि राउत धेरै सार्वजनिक कार्यक्रममा देखिएका छैनन् र उनले सुसुप्त रुपमा संगठन निर्माणको काम भने जारी राखेका छन्।