कैलालीमा चक्कु प्रहारबाट एकजनाको हत्या

कैलाली, ३ साउन । कैलालीको गौरीगंगा नगरपालिका– ७, महुलियामा चक्कु प्रहारबाट एक व्यक्तिको हत्या भएको छ । स्थानीय २६ वर्षीय रमेश विकले सामान्य विवादमा २७ वर्षीय मानबहादुर सोमैको चक्कु प्रहार गरेर हत्या गरेका हुन् ।

रमेशको चक्कु प्रहारबाट सोमैी गम्भीर घाइते भएका थिए । सोमैलाई उपचारका लागि अस्पताल लगिएको थियो तर अत्यधिक रक्तश्रावका भएकाले मृत्यु भएको कैलालीका निमित्त प्रहरी प्रमुख प्रहरी नायब उपरीक्षक हरिबहादुर ओलीले जानकारी दिए ।

प्रहरीका अनुसार, साउने संक्रान्तिका दिन डिजे बजाउने क्रममा दुईजनाबीच सामान्य विवाद भएको थियो । बुधबार साँझ सोही विषयमा विवाद गर्न मानबहादुर मदिरा सेवन गरेर रमेशको घर पुगेका थिए । विवाद बढ्दै जाँदा रमेशले भान्सामा रहेको चक्कु झिकेर मानबहादुरलाई हानेका थिए । प्रहरीले रमेश बिक र उनका बुवा नरबहादुर बिकलाई पक्राउ गरेको छ ।