उपभोक्ता स्वास्थ्य जोगाउन बजारमा सरकारको छापा: सयभन्दा बढी नक्कली वस्तु नियन्त्रणमा

नेपाली बजारमा उपभोक्ताको स्वास्थ्य र अधिकारमाथि भइरहेको खेलबाडलाई रोक्न सरकारले नक्कली उत्पादनविरुद्ध आफ्नो उपस्थिति बलियो बनाएको छ। उद्योग, वाणिज्य तथा आपूर्तिमन्त्री गौरी यादवले बजारमा गुणस्तरहीन र नक्कली सामानको बिक्री-वितरण तत्काल रोक्न कडा निर्देशन दिनुभएपछि नियामक निकायहरू पूर्ण रूपमा सक्रिय भएका हुन्। मन्त्रालयको यो अग्रसरतासँगै उपभोक्ता स्वास्थ्य संरक्षणका लागि बजार अनुगमन प्रणालीलाई थप  व्यवस्थित बनाइएको छ।

मन्त्रीको निर्देशनलगत्तै वाणिज्य, आपूर्ति तथा उपभोक्ता संरक्षण विभागले काठमाडौँलगायतका विभिन्न बजार केन्द्रहरूमा आकस्मिक अनुगमन तीव्र पारेको छ। सो क्रममा विभागले बजारबाट करिब एक सयभन्दा बढी शङ्कास्पद नक्कली उत्पादनहरू नियन्त्रणमा लिन सफल भएको छ। सरकारी छापा मारीपछि बरामद गरिएका ती सामग्रीहरूको गुणस्तर र मौलिकता प्रमाणित गर्नका लागि हाल प्रयोगशालामा विस्तृत ल्याब टेस्टको प्रक्रिया अघि बढाइएको छ।

बजारलाई स्वच्छ, सुरक्षित र पारदर्शी बनाउने उद्देश्यसहित विभागका महानिर्देशक मोती सापकोटा आफैँ नियमित रूपमा अनुगमन टोलीसँगै मैदानमा खटिनुभएको छ। विभागले नियन्त्रणमा लिएका सामग्रीहरूको परीक्षण प्रतिवेदन आउनासाथ दोषी प्रमाणित हुने उत्पादक तथा बिक्रेतामाथि  कानुनबमोजिम कडा कानुनी कारबाही चलाउने तयारी गरेको छ। नियामक निकायले आम उपभोक्तालाई पनि बजारमा कुनै शङ्कास्पद वस्तु भेटिएमा तत्काल आधिकारिक संयन्त्रमा सूचना दिएर सहयोग गर्न आह्वान गरेको छ।

सरकारी अधिकारीहरूले उपभोक्ताको स्वास्थ्यमा खेलबाड गर्ने तत्वहरूलाई कुनै पनि हालतमा नछाड्ने प्रतिबद्धता जनाएका छन्।