ग्राण्डीमा ठगीधन्दा प्रकरण : हेलिकोप्टर नउडाएरै झण्डै २ लाख झ्वाम

उदय जीएम

काठमाडौं, ३१ साउन । ग्राण्डी इन्टरनेशनल हस्पिटलमा गम्भीर तथा सिकिस्त विरामीहरुबाट हेलिकोप्टर नउडाएरै लाखौं रकम असुल गर्ने र सेवाग्राहीहरुको जीवनमाथि नै खेलवाड गर्ने गरेको तथ्य खुलेको छ । पछिल्लोपटक दाङकी रुद्रा पुनका लागि हेलिकोप्टर मगाउन ४ लाख ५० हजार पठाइएकोमा हेलिकोप्टर नउडाएरै १ लाख ८० हजार असुल गरिएको छ भने रुद्रा पुनको जीवनमाथि खेलवाड गरिएको छ ।

साउन १३ गते बिहान करीव ११.४५ बजेतिर भूमे– ९ रुकुम घर भई हाल घोराही उपमहानगरपालिका मिलनचोकमा बस्दै आएकी ५६ वर्षीया रुद्रा पुनलाई एक्कासी हृदयघात भएको थियो । उपचारका लागि स्थानीय अस्पतालमा पुराएपछि अस्पतालले रुद्राको स्वास्थ्य अवस्था अत्यन्त गम्भीर रहेकाले उपचार असम्भव भएको र भारतको लखनौं वा काठमाडौं लैजान भनेको थियो । त्यसपछि आत्तिएका आफन्तजनहरुले काठमाडौंको ग्राण्डी इन्टरनेशन हस्पिटलमा सम्पर्क गरी हेलिकोप्टर चार्टर गर्नका लागि ४ लाख ५० हजार रुपैयाँ अग्रिम पठाएका थिए । ग्राण्डीबाट हेलिकोप्टर नपठाएर गम्भीर अवस्थामा रहेकी रुद्रा पुनको जीवनमाथि खेलवाड त गर्यो नै उल्टै पोखरासम्म हेलिकोप्टर उडाएको भन्दै १ लाख ८० हजार असुल गरिएको रुद्राकी भतिजा विकास पुनमगरले बताए । विकासका अनुसार उनीहरुलाई सो रकमको भ्याट बिल वा रसिद केही दिइएको छैन ।

विरामीको जीवनमाथि खेलवाड गर्नुका साथै गैरजिम्मेवारी प्रदर्शन र ठगीमात्रै होइन राजस्व छली गर्ने नियतले ४ लाख ५० हजार नगद पनि हस्पिटलको खातामा नभई व्यक्तिको नाममा पठाउन भनिएको थियो । हस्पिटलका यातायात व्यवस्थापक आशीष आनन्दले “सुरेन्द्र बुढाथोकी”को नाममा उक्त रकम पठाउन भनेका थिए र सोहीअनुसार विरामीका आफन्तले रकम पठाएका थिए ।

विकासका अनुसार यातायात व्यवस्थापक आशीष आनन्दले फोन गरी “दाङमा मौसम खराब भएकाले हेलिकप्टर पोखरामा ल्याण्ड भयो । तपाईहरु भोलिसम्म पर्खनुस् । भोलितिर मौसम मिलेमा पठाइदिन्छौं” भनेर फोन काटेका थिए । हस्पिटलका मिडिया कोअर्डिनेटर विनोद अधिकारीले हेलिकोप्टर काठमाडौंदेखि पोखरासम्म उडेकाले १ लाख ८० हजार भाडावापत काटिएको जानकारी दिएका थिए । सो रकमको रसिद आफूहरुसँग भएको दावी पनि उनले गरेका थिए । अधिकारीले डा. अजयसिंह थापाको नेतृत्वमा मेडिकल टिम हेलिकोप्टरमा उडेको तर मौसम खराव भएर पोखरामा ल्याण्डिङ भएको दावी गरेका थिए ।

यद्यपि, मिडिया कोअर्डिनेटर अधिकारीको दावी पनि झुठो सावित भएको छ । एटीसी पोखराको सूत्रका अनुसार साउन १३ र १४ गते डाइनेष्टिक हेलिकोप्टर पोखरामा अवतरण भएकै छैन । हस्पिटल सम्बद्ध व्यक्तिहरले साउन १३ गते दाङको मौसम खराब भएका कारण पोखरामा ल्याण्ड भएको र हेलिकोप्टर रातभर पोखरामै रहेको दावी गरेका थिए । एटीसी पोखराको सूत्रका अनुसार एयर डाइनेष्टिकको हेलिकोप्टर साउन १३ र १४ गते पोखरामा अवतरण भएकै छैन । बरु, एयर डाइनेष्टिकको हेलिकोप्टर काठमाडौं–पोखरा–बागलुङका लागि उडान भरेको एटीसी पोखराले जनाएको छ ।

यता, रुद्रा पुनका आफन्तहरुले भने आत्तिएर विरामीलाई साउन १३ गते बेलुकी नै दाङबाट एम्बुलेन्समा हिडाएर १४ गते बिहान काठमाडौं ल्याइपुराएका थिए । थापाथलीस्थित नर्भिक इन्टरनेशनल हस्पिटलमा ५ दिनसम्म सघन उपचारकक्षमा उपचार गरेपछि रुद्रा पुनको स्वास्थ्यस्थितिमा निकै सुधार आइसकेको छ ।