छुटे डन गणेश लामा, माला लगाएर दीपक मनाङेले गरे बिदाई

गुण्डा नाइके गणेश लामा थुनामुक्त भएका छन् । हातहतियार तथा खरखजाना मुद्दामा कैद सजाय पाएका लामा सोमबार राती छुटेका हुन् । गत फागुन ३० गते काठमाडौँ प्रहरी परिसरको विशेष टोलीले उनलाई एक पेस्तोल र ६ राउण्ड गोलीसहित पक्रिएको थियो । गौशलामा रहेको पशुपति भिजन होटलमा गोली चलेपछि त्यहाँ पुगेको प्रहरीले लामालाई पक्राउ गरेको हो ।

जिल्ला प्रशासन कार्यालय, काठमाडौँले लामालाई २६ चैतमा थुनछेक आदेश बमोजिम हातहतियार तथा खरखजाना ऐन २०१७ अनुरुप पुर्पक्षका लागि डिल्लीबजार कारागार पठाएको थियो । मुद्दाको फैसलामा उनलाई ७० हजार रुपैयाँ जरिवाना र ७ महिनाको कैद तोकिएको थियो ।

असोज २८ गतेसम्ममा उनलाई दिइएको कैद सजाय कट्टा भएको र थुनामा राख्नु पर्ने अन्य मुद्दा नदेखिएको कारण थुनामुक्त गरिएको डिल्लीबजार कारागारले जनाएको छ । थुनामुक्त भएका लामालाई डिल्लीबजार कारागारमै रहेका अर्का गुण्डा नाइके दीपक मनाङेले माला लगाएर विदाई गरेको कारागार श्रोतले जनाएको छ । मनाङे लामाका गुरु मानिन्छन् । रेष्टुरेन्टमा बाउन्सर काम गरिरहेका लामालाई मनाङेले नै गुण्डागर्दीको दुनियाँमा भित्राएका थिए ।