जापान जान प्रमाणपत्रको पछि नलाग्नु

नेपाली कामदार जापान लैजान दुई देशका सरकारबीच समझादारी भएसँगै नेपाली कामदारका लागि नयाँ गन्तव्य खुलेको छ ।

जापानले नेपाली कामदार लैजाने चर्चा चलेसँगै निजी क्षेत्रले भने केही महिना पहिलेदेखि धमाधम जापानी भाषा सिकाउने संस्था खोलेका थिए ।

कतिपय युवाले भाषा सिकेको प्रमाणपत्र बोकेर कामदारका रुपमा जापान जाने पर्खाइमा रहेको बताउने गरेका छन् ।

तर श्रम, रोजगार तथा सामाजिक सुरक्षा मन्त्रालयले भाषा परीक्षा र सीप परीक्षा दुवैमा उत्तीर्ण भएकालाई मात्र जापानले कामदारका रूपमा लैजाने समझदारीपत्रमा उल्लेख भएकाले प्रमाणपत्रको पछि नलाग्न सबैलाई आग्रह गरेको छ।

मन्त्रालयका निमित्त सचिव रामप्रसाद घिमिरेले कसैले म उच्च तहको प्रमाणपत्र दिन्छु, म प्रमाणपत्र मिलाइ दिन्छु भन्दै आएमा त्यसको पछि नलाग्न आग्रह गरे । प्रमाणपत्रको कुनै काम नरहेको उनको भनाई छ । जापान जानका लागि उनीहरूले लिने परीक्षामा उतिर्ण हुनुको विकल्प नरहेको पनि उनले बताए ।

नर्सिङ र केयर गिभरमा जानेहरूका लागि अरू भन्दा धेरै त्यहाँको भाषा बुझेको हुनु पर्ने भएकाले त्यसको भाषा परीक्षा उच्च तहको हुने निमित्त सचिव घिमिरेको भनाइ छ । अन्य कामदारको लागि भने सामान्य स्तरको भाषा परीक्षा लिइने छ ।

यस्ता परीक्षा जापान सरकारकै निकायले लिनेछ भने नेपाल सरकारले सहजीकरण मात्रै गर्नेछ ।