झाडापखालाले पूरै गाउँ आक्रान्त, एकजनाको ज्यान गयो

काठमाडौं, ८ असोज । महोत्तरी जिल्लाको जलेश्वर नगरपालिका वडा नं. १२ स्थित मुस्लिम बस्ती नैन्हीमा झाडापखालाले पूरै गाउँ आक्रान्त पारेको छ । झाडापखालाको प्रकोपले ४ वर्षीया खुश्बु खातुनको मृत्यु भएको छ । झाडापखालाकै कारण २५ जना बिरामी परेका छन् ।

मामाघरमा बस्दै आएकी भारतीय नागरिक खुश्बुको उपचार गर्दागर्दै जिल्ला स्वास्थ्य कार्यालय महोत्तरीमा मृत्यु भएको हो । अन्य पाँच जनालाई गाउँकै स्वास्थ्य शिविरमा राखेर उपचार गराउन थालिएको छ । चारजनाको अवस्था गम्भीर भएपछि थप उपचारको लागि जिल्ला अस्पताल जलेश्वर पठाइएको छ । गर्भवती र बालबालिका पनि पखालाबाट बिरामी परेका छन् ।

मुस्लिम बस्तीमा चार दिनअघि नै झाडापखालाको प्रकोप देखिएको थियो । गाउँलेका अनुसार नैन्हीका खेतमा पाइने माछा खाएपछि प्रकोप देखिएको हो । तर स्वास्थ्यकर्मी सन्तोष ठाकुरका अनुसार माछा नखाएकाहरुमा पनि समस्या देखिएको छ । भदौ २९ गतेदेखि प्रकोप फैलिएर सिङ्गो गाउँ नै आक्रान्त बनेपछि स्थानीय मदरसा पनि बन्द गरिएको छ । प्रभावित क्षेत्रमा अहिले जिल्ला स्वास्थ्य कार्यालयबाट स्वास्थ्य निरीक्षक सन्तोष ठाकुरको नेतृत्वमा स्वास्थ्य टोली खटिएको छ ।