डलरसँगै खाडी मुलुकका मुद्रा महंगिए, हेर्नुस् कुन देशको कति बढ्यो

काठमाडौं । अमेरिकी डलर महंगो भएपछि नेपालमा रेमिट्यान्स भित्रिने प्रमुख राष्ट्रहरुको मुद्रा समेत महँगिएको छ। रोजगारका लागि नेपालीहरु जाने प्रमुख देशका मुद्रा बढेपछि नेपालमा भित्रिने रेमिट्यान्स बढ्ने भएको हो ।

रोजगारीका लागि नेपालीहरु पुगेका देश साउदी, कतार, मलेशिया लगायतका मुद्रा बढेका छन् ।विदेशी मुद्रा मंहगो भएसँगै नेपालमा भित्रिने रेमिट्यान्स रकम बढ्ने निश्चित भएको छ ।

आइतबार अमेरिकी डलरको खरिददर ११४ रुपैयाँ ४८ पैसा पुग्यो भने बिक्रीदर ११५ रुपैयाँ ८ पैसा पुग्यो। नेपाल राष्ट्र बैंकका अनुसार कतारी रियाल एक महिनामा १ रुपैयाँ ३७ पैसाले महँगिएको छ।
यसैगरी दुबई, साउदी, कतार, मलेसियाका मुद्रा पनि महंगो भएका छन् ।

आइतबार एक कतारी रियालको खरिददर मूल्य ३१ रुपैयाँ ४४ पैसा र बिक्रीदर ३१ रुपैयाँ ६१ पैसा पुगेको छ। एक महिनाअघि एक कतारी रियालको खरिददर मूल्य ३० रुपैयाँ ०७ पैसा र बिक्रीदर ३० रुपैयाँ २४ पैसा थियो।

मलेसियन रिंगिट एकको खरिददर २७ रुपैयाँ ६२ पैसा र बिक्रीदर २७ रुपैयाँ ७६ पैसा रहेको छ। एक महिनाअगाडि रिंगिटको खरिददर २६ रुपैयाँ ८७ पैसा र बिक्रीदर २७ रुपैयाँ ०२ पैसा थियो।

युएई दिर्हाम एकको खरिददर ३१ रुपैयाँ १७ पैसा र बिक्रीदर ३१ रुपैयाँ ३३ पैसा पुगेको छ। एक महिनाअघि यसको खरिददर २९ रुपैयाँ ८१ पैसा र बिक्रीदर २९ रुपैयाँ ९७ पैसा थियो।

एक साउदी रियालको खरिददर मूल्य ३० रुपैयाँ ५२ पैसा र बिक्रीदर मूल्य ३० रुपैयाँ ६८ पैसा कायम भएको छ। एक महिनाभित्रै साउदी रियाल १ रुपैयाँ ३२ पैसाले बढेको हो।