दशैंको मुखमा ऋण खोज्न बाध्य हुँदै शिक्षक र विद्यालय कर्मचारी

काठमाडौं,२१ असाेज।  दशैंको मुखमा राजधानी काठमाडौंका शिक्षक, विद्यालय कर्मचारी तथा शिक्षा कार्यालयका कर्मचारीहरुले तबल नपाउँदा अन्योलमा परेका छन् । स्थानीय निकायमार्फत भुक्तानी गर्नुपर्ने तलब समयमा पाउन नसक्दा दशैं खल्ला हुन लागेको एक शिक्षकले बताए । काठमाडौं महानगरपालिकाले भुक्तानी गर्ने तलबको अझै प्रक्रिया समेत अघि नबढेको पीडित शिक्षकहरुको भनाई छ । शिक्षक मात्रै नभएर शिक्षा कार्यालयमा दरबन्दी भएका कुनै पनि कर्मचारीले गत साउनदेखि नै तलब पाउन नसकेको गुनासो गरेका छन् ।

काठमाडौं महानगरपालिकाबाट जानुपर्ने बजेट हालसम्म पनि नगएको बसन्तपुरमा रहेको एक विद्यालयका शिक्षकले बताए । सरकारले जिल्ला शिक्षा कार्यालय खारेज गरी स्थानीय तहबाटै शिक्षकको तलब भुक्तानी गर्ने व्यवस्था गरेपनि दशैं नजिकिँदै आउँदा समेत तलब पाउन नसकेको गुनासो पीडित शिक्षकहरुले गरेका छन् । घटनस्थापना सुरु हुनै लागेको, दशैंको लागि नयाँ नोट साट्ने व्यवस्था समेत सुरु भइसक्दा समेत साउनदेखिको तलब नपाएपछि शिक्षकहरु दशैं मान्न ऋण काट्नुपर्ने अवस्थामा पुगेको बताइन्छ ।