दुईजना उभिएको भरमा संसद अवरुद्ध हुन दिनुहुन्न : प्रधानमन्त्री

काठमाडौं, ११ साउन । प्रधानमन्त्री केपी शर्मा ओलीले जनताबाट अस्वीकृत भएकाहरुको चुरीफुरी उपयुक्त नहुने बताएका छन् । नेपाल कम्युनिस्ट पार्टी (नेकपा)को संसदीय दलको बैठकलाई बालुवाटारमा सम्बोधन गर्दै प्रधानमन्त्री ओलीले सो कुरा बताएका हुन् ।

प्रधानमन्त्री ओलीले संसदमा सांसदहरुलाई सरकारका कामकारबाहीका बारेमा डटेर कुरा राख्न निर्देशन समेत दिएका छन् । प्रधानमन्त्रीले भने, “संसदीय अभ्यासमा अभ्यस्त भइसकेका साथीहरुले अगुवाई गर्ने, नयाँ साथीहरुले त्यसलाई पछ्याउने गर्नुपर्यो ।” प्रधानमन्त्री ओलीले शीर्ष नेताहरुले सरकार, नीति तथा कार्यक्रम र बजेटका पक्षमा खुलेर कुरा राख्नुपर्ने बताउँदै त्यसले संसद र जनतामा पनि राम्रो सन्देश प्रवाह हुने बताए ।

संसदमा एक दुईजना उभिएका भरमा संसद अवरुद्ध हुन दिनु नहुने प्रधानमन्त्री ओलीको भनाई छ । प्रधानमन्त्री ओलीले असोज ३ गते सम्ममा कानुनहरु बनाई सक्नुपर्ने भएकोले संसद अवरुद्धताले यो कार्यसूचीलाई असर गर्ने बताएका छन् । “यी सबै काम समयमै सक्नका लागि हाम्रा सांसदहरुले सभामुख र राष्ट्रिय सभाका अध्यक्षलाई बल दिनु पर्दछ”, प्रधानमन्त्रीले भने ।

मन्त्रालय विभाजनको बारेमा बोल्दै प्रधानमन्त्री ओलीले भने “संविधानले २५ वटासम्म मन्त्रालय र मन्त्री बनाउन अधिकार दिएको छ । त्यस कारण आवश्यकता अनुसार मन्त्रालय विभाजन गरिएको हो ।” कार्यक्रममा नेकपाका अध्यक्ष पुष्पकमल दाहाल प्रचण्डले पनि पार्टी र सरकार विरुद्ध भइरहेका षडयन्त्रलाई चिर्नुपर्ने बताएका छन् ।