धादिङमा गुण्डागर्दि मौलायो: खाजा खाँदै गरेका युवामाथि तरबार प्रहार गरी सांघातिक आक्रमण

धादिङ । पछिल्लो समय धादिङ जिल्लामा गुण्डागर्दि मौलाएको छ । गुण्डागर्दिको आरोपमा पटकपटक पक्राउ पर्दै छुट्दै आएका राधाकृष्ण भण्डारी ‘राधे’को समुह फेरी सक्रिय हुँन थालेको छ ।

सोमबार धादिङ बेसी स्थित शान्तबजारको एक होटलमा खाजा खाइरहेका आयुप तामाङमाथि ‘राधे’ भण्डारी र उनका समुहका गोपी कृष्ण भण्डारी सहितका ६ जनाको समुहले सांघातिक हमला गरेको छ । ६ वटा बाइका आएका ‘टोले गुण्डा’हरुको सो समुहले तरबार प्रहार गरेको थियो । तरबार प्रहारपछि गम्भिर घाइते भएका आयुपलाई उपचारका लागि न्युरो अस्पताल बासबारी ल्याइएको छ ।

उनको अवस्था चिन्ताजनक रहेको परिवारिक स्रोतले जनाएको छ । पीडित तामाङका अनुसार उनलाई आक्रमण गर्न राधाकृष्ण भण्डारी, गोपी कृष्ण भण्डारी, सन्देश तामाङ, प्रकाश तामाङ लापाली, प्रकाश घले, व्रिजेश गुप्ता र मोहन पाण्डेले आक्रमण गरेका थिए ।

स्रोतका अनुसार केही दिनअघि राधे भण्डारी समुहका सदस्यले आयुपले चलाउँदै आएको टिफर तोडफोड गरेको थियो । तोडफोडपछि प्रहरीलाई उजुरी गर्न पुगेका उनले न्याय नपाएको गुनासो गर्दै आएका थिए । ‘प्रहरीमा उजुरी किन दिइस् भन्दै आक्रमण भयो,’ एक प्रत्यक्षदर्शीले भने,‘तरबारले पटक पटक प्रहार गरेपछि आयुप तामाङ गम्भिर घाइते भए ।’

आयुपको टाउकोमा गम्भिर चोट लागेको छ । केही वर्ष अघि हतियारसहित पक्राउ परेका राधे राजनीतिक पहुँचको प्रयोग गर्दै छुटेका थिए ।

धादिङ प्रहरीका एसपी सरद खत्रीले घटनामा समलग्नहरुको खोजी भइरहेको जानकारी दिए । ‘अनुसन्धान भइरहेको छ । घाइते न्युरोमा हुनुहुन्छ,’ उनले भने,‘छिटै घटनामा समलग्नहरु पत्ता लाग्नेछन् ।’