नेपाली सिने-सेलिब्रेटीहरुका यी ५ ठूला झगडा (कारण सहित)

काठमाडाै, ११ साउन । केही दिनअघि काठमाडौँमा आयोजित एक कार्यक्रममा नायिका सुष्मा कार्की र नायिका पूजा शर्माको दुश्मनी छरपष्ट भयो। दुष्मनीको कारण पत्ता नलागेपनि सार्वजनिक कार्यक्रममा एकअर्काले बेवास्ता गर्नुले केही गडबडी छ भन्ने छर्लङ्ग भएको छ।  हुन त, नेपाली सिनेमाका कलाकारहरुको शत्रुता र मित्रता कहाँ कतिबेला कोसंग किन हुन्छ थाहै हुन्न । तर केही कलाकारहरुको शत्रुता भने निकै चर्चामा पुग्ने गर्छ । आउनुस् नेपाली सिने उद्योगमा चलेका केही कलाकारहरु विचको ५ वटा विवाद र झैझगडाका बारेमा चर्चा गरौँ:

नायिका स्यारोन श्रेष्ठ र निर्माता सुनिल रावल

नेपाली कलाकारको कचिलो छरपष्ट भएको अर्को घटना हो स्यारोन श्रेष्ठ र निर्माता सुनिल रावलबीचको सेक्सुअल ह्यारेस्मेन्ट। सायद, होस्टल, होस्टल रिटन्र्स जस्ता हिट सिनेमा दिएका निर्माता सुनिल रावलले सायद-२ निर्माण गरे, नायक शुसिल श्रेष्ठ र नायिका स्यारोन श्रेष्ठलाई लिएर। पहिलो पटक तोकिएको मितिमा रिलिज नभएर पटक-पटक सरेको सिनेमा अन्ततः ३० असारमा प्रदर्शनमा आयो। सिनेमाले सोचे भन्दा निकै कमजोर व्यापार गरेपछि निर्माता रावलले नायिका स्यारोनमाथि ‘रहर पुरा गर्न सिनेमा खेल्न आएको’ भन्दै प्रमोशनमा असहयोग गरेको आरोप लगाए। आफ्नो पैसामा मोज गरेको र रहर पुरा गरेर स्यारोन प्रचार-प्रसारमा नआएको भन्दै अन्तर्वार्ता दिएपछि नायिका स्यारोनले प्रेसमिटको आयोजना गरेरै आफूमाथि निर्माता रावलले सिनेमा छायाङ्कनको क्रममा ‘सेक्सुअल ह्यारेसमेन्ट’ गरेको आरोप लगाइन्।

यो विवादले निर्माता रावलको छवि निकै धमिलिन पुग्यो। उनले निर्माण गरेको ‘होस्टेल’ कि नायिका प्रकृति श्रेष्ठलेसमेत निर्माता रावलको चाला ठीक नभएको भन्दै स्टाटस लेखेपछि रावल अप्ठ्यारोमा परे। धेरैको सहानुभूति नायिका स्यारोन श्रेष्ठमाथि गएपछि अन्ततः रावलले नायिका श्रेष्ठसँग माफि मागे भने उप्रान्त आफ्नो बारेमा नराम्रो नबोल्ने भनेर नायिका श्रेष्ठलाई पनि सम्झौता गर्न लगाए।

नायक भुवन केसी र राजेश हमाल
नेपाली सिने उद्योगका लागि केसी र हमाल निकै ठूलो नाम हो। तर उनीहरुबीचको सम्बन्ध खासै राम्रो छैन भन्नेहरु धेरै छन्। उनीहरुको व्यवहार पनि उस्तै देखिन्छ। राजेश र भुवन हत्तपत्त सँगै कार्यक्रममा त देखिन्नन् नै, देखिएपनि मुन्टो बटारेर बस्ने गरेका छन्।

नायिका रेखा थापा
नायिका रेखा थापा सबैभन्दा धेरै झगडा गर्ने सेलिब्रेटीमा पर्छिन् भन्दा अन्यथा नहोला। स्पष्ट र कडा स्वभावकी नायिका थापा कहिले आफ्नै भनाईका कारण विवादमा पर्छिन् त कहिले हर्कतका कारणले। पत्रकारलाई समेत झापड लगाउन पछि नपर्ने यी नायिकाले राजेश हमाललाई महानायक नमान्ने तर्क गरेपछि विवादमा परेकी थिइन्।

नायिका थापा पछिल्लो समय छक्कापञ्जा टिम र नायिका ऋचा शर्माको ‘गेट वेल सुन’ काण्डमा पनि मुछिन पुगिन्। ऋचा र छक्कापञ्जा टिमको विवादमा फेसवुक स्टाटसमा कमेन्ट गर्दै जोकर भन्दा कहिल्यै माथि उठ्न सक्दैन भन्न भ्याइन्। जवाफमा दीपाश्री निरौलाले ‘थ्याङक यु रेखा’ लेखिन्। त्यस अघि सार्वजनिक कार्यक्रममा रेखा थापालाई दीपाले हास्यव्यङ्ग्य कार्यक्रममा व्यङ्ग्य गरेको रिस रेखाले फेरेको धेरैले अनुमान गरेका थिए। उनीहरुको शत्रुता केही दिन अगाडि समाप्त भएको छ। यतिबेला उनीहरु कार्यक्रममा सँगै गाला जोडेर फोटो खिच्ने र अन्तर्वार्ता दिने गरेका छन्।

सन्तोष सेन, प्रदीप खड्का र सुदर्शन थापा, पूजा शर्मा
सिनेमा उद्योग बाहेक आम दर्शकलाई थाहा हुने गरी भएको कलाकारको झगडामध्ये निर्माता सन्तोष सेन, प्रदीप खड्का र निर्देशक सुदर्शन थापा, पूजा शर्माबीचको झगडा पनि एक हो। निर्माता सन्तोष सेन खेमामा नायक प्रदीप खड्का र निर्देशक सुर्दशन थापाको खेमामा नायिका पूजा शर्मा छन्। सेन र थापा मिलेर ‘चंखे शंखे पंखे’ निर्माण गरेपछि सफल सिनेमा ‘प्रेमगीत’ बनाए। तर उनीहरुले आफ्ना सम्बन्ध भने भत्काए।

विवादको मुख्य कारण थाहा नभएपनि आर्थिक पाटो भएको कतिपयको आशंका छ। तिक्तता यति बढेर गयो कि उनीहरुएक अर्काको नाम समेत सुन्न तयार थिएनन्। यही तिक्तताका कारण सुर्दशनले निर्देशन गरेको सिनेमा ‘म यस्तो गीत गाउँछु’, सन्तोष सेनले निर्माण गरेको सिनेमा ‘प्रेमगीत-२’ लगभग एउटै समयमा प्रदर्शनमा आयो।

यसै घटनामा ऋचाको पक्ष लिँदै बोलेपछि नायिका रेखा थापा पनि विवादमा तानिएकी थिइन्।

(प्रभात लामाले नेपाल खबरमा लेखेका छन्)