नेपाल–चीन सीमामा थप ५ वटा नाका खोल्ने तयारी

शिखरन्युज, ४ असार – प्रधानमन्त्री केपी शर्मा ओलीले आफ्नो आसन्न चीन भ्रमणका बारेमा जानकारी गराउँदै नेपाल–चीन सीमा क्षेत्रमा थप ५ वटा नाका खोल्ने तयारी भएको बताएका छन् ।

चीन भ्रमणको तयारीका सम्बन्धमा पूर्वप्रधानमन्त्रीहरुलाई जानकारी गराउदैँ भ्रमणका अवसरमा नेपाल–चीन सीमा क्षेत्रमा थप ५ नाका खोल्ने समझदारी हुन लागेको जानकारी दिए ।

पूर्वप्रधानमन्त्रीहसँगको भेट अघि प्रधानमन्त्री ओलीले परराष्ट्र मन्त्री प्रदिपकुमार ज्ञवालीसँग भ्रमण सम्बन्धमा छलफल गरेका थिए । परराष्ट्रमन्त्री ज्ञवालीसँगको भेटमा उहाँले भ्रमणपछि नेपाल चीन सम्बन्ध नयाँ उचाईमा प्रवेश गर्ने र चीन– भारतबीच बढ्दो सम्झदारीले नेपालले थप अवसर प्राप्त गर्ने बताएका थिए ।

भ्रमणमा समझदारी पत्रमा हस्ताक्षर र ‘लेटर अफ एक्सचेन्ज’ आदानप्रदान हुने जानकारी दिएका थिए । परराष्ट्रमन्त्री ज्ञवालीले भ्रमणले विगतका सम्झदारी र सम्झौताको कार्यान्वयनको बाटो खुल्ने विश्वास व्यक्त गरे ।

‘भ्रमणका क्रममा सहयोगका नयाँ क्षेत्र पनि पहिल्याइने छ । दुई देशबीच कनेक्टेभिटीका क्षेत्रमा महत्वपूर्ण सम्झदारी हुनेछ ।’ परराष्ट्रमन्त्री ज्ञवालीले बताए । साथै केरुङ–काठमाडौ, काठमाडौँ–पोखरा रेल परियोजनाका सम्बन्धमा विस्तृत प्रतिवेदन बनाएर अघि बढ्ने समझदारी हुने जानकारी गराए ।
पुर्वप्रधानमन्त्रीसँगको छलफलमा पुर्वप्रधानमन्त्री शेरबहादुर देउवाले चीन भ्रमणमा नेपालको तयारी राम्रो रहेको बताउँदै भ्रमणले नेपालको हित हुने विश्वास व्यक्त गरेका थिए ।

त्यसैगरी पूर्व पूर्वप्रधानमन्त्रीहरु पुष्पकमल दाहाल, झलनाथ खनाल, बाबुराम भट्टराई, माधव कुमार नेपालले प्रधानमन्त्री ओलीलाई लिखित तथा मौखिक सुझाव दिएका थिए । त्यसैगरी मन्त्रीपरिषद्का पूर्व अध्यक्ष खिलराज रेग्मीले नेपालमा चीनिया लगानी भित्राउने बातावरण बन्नुपर्ने बताए ।