न्यायाधीशहरु शंकाको घेरामा, चारजनालाई स्पष्टीकरण सोधियो

काठमाडौं । न्याय परिषद्ले मुद्दा छिन्ने सिलसिलामा शंकास्पद देखिएको भन्दै उजुरीका आधारमा चारजना जिल्ला न्यायाधीशलाई स्पष्टीकरण सोधेको छ । प्रधानन्यायाधीश एवं न्याय परिषदका अध्यक्ष चोलेन्द्र समशेर जबराको अध्यक्षमा बसेको परिषद् वैठकले जिल्ला न्यायाधीशले मुद्दा छिन्ने क्रममा गल्ती गरेको शंका गर्दै स्पष्टिकरण सोधेको हो ।

न्यायपालिका शुद्धीकरण अभियानक्रममा परिषद्को वैठकले तनहुँ जिल्ला न्यायाधीश ओमकार उपाध्याय, ललितपुर जिल्ला अदालतका न्यायाधीश विश्वमंगल आत्रेय, सर्लाहीका जिल्ला न्यायाधीश राजेश काफ्ले र भक्तपुरका जिल्ला न्यायाधीश मोहम्मद जुनैद आजादलाई सात दिने लिखित स्पष्टीकरण सोधेको हो ।

न्याय सम्पादन गर्दाको कार्यसम्पादनका विषयमा जाँचबुझ गर्न सर्वोच्च अदालतका न्यायाधीश आनन्दमोहन भट्टराइको संयोजकत्वमा तीन सदस्सीय कमिटी गठन गरेको छ । जाँचबुझ समितिको सदस्यमा उच्च अदालत पाटनका मुख्य न्यायाधीश प्रकाश ढुंगाना, उच्च अदालत पाटन हेटौंडा इजसालका न्यायाधीश टेकप्रसाद ढुंगाना रहेका छन् ।

परिषद्को बिहिबारको बैठकले न्यायाधीशले बदनियतपूर्वक काम गरेको हुँदा स्पष्टीकरण सोध्ने निर्णय गरेको थियो । यसअघि पनि परिषद्ले न्यायाधीशले वदनियतपूर्वक काम गरेको आरोपमा केही न्यायाधीशलाई काज सरुवा गरेको थियो ।