पुनः मतदानको फाइदा रेणु दाहाललाई ….

चितवन, साउन २१ – सर्वाधिक चर्चामा रहेको भरतपुर महानगरपालिकाको मेयर पदमा माओवादी केन्द्रकी उम्मेदवार रेणु दाहाल विजयी हुनुभएको छ । उहाँले  ४३ हजार १२७ मत प्राप्त पाउनुभयो भने नेकपा एमालेका मेयर पदका उम्मेदवार देवीप्रसाद ज्ञवालीले ४२ हजार ९२४ मत प्राप्त गर्नुभयो । दाहालले ज्ञवालीलाई २ सय ३ मतकाे अन्तरले हराउनुभएको छ ।

उपमेयर पदमा नेपाली कांग्रेसकी पार्वती शाह विजयी हुनुभएको छ । उहाँले ४७ हजार १९७ मत प्राप्त गर्नुभयो भने उहाँका निकटतम प्रतिद्वन्द्वी नेकपा एमालेकी दिव्य शर्मा आचार्यले ३९ हजार ५२५ मत प्राप्त गर्नुभयो । भरतपुर महानगरपालिकाका २९ वडामध्ये १४ वटा वडामा एमाले, १२ वटा वडामा कांग्रेस र ३ वटा वडामा माअोवादी  बिजयी भएको छ ।

भरतपुर महानगरपालिकामा कांग्रेस र माओवादी केन्द्रबीच ताल मेल भएको थियो । जस अनुसार माओवादीलाई मेयर र कांग्रेसलाई उपमेयर पद विभाजन गरिएको थियो । वडाहरुमा भने तालमेल हुन सकेको थिएन ।

दाहाल माओवादी केन्द्रका अध्यक्ष एवं पूर्व प्रधानमन्त्री पुष्पकमल दाहालकी छोरी हुनुहुन्छ । भरतपुरमा नेपाली कांग्रेसले एक्लै चुनाव जित्ने अवस्था थियो । यस्तो ठाउँमा मेयर पद नै माओवादीलाई दिएर तालमेल गरेको भन्दै कांग्रेसका मतदाताहरु रुष्ट भएका थिए । माओवादी र कांग्रेसका नेताहरुले संयुक्त अभियान चलाए पनि मतगणना हुँदा कांग्रेसलाई मतदान गरेकाहरुमध्ये धेरैले मेयरमा रेणु दाहाललाई मतदान गरेका थिएनन् ।

पहिलो चरणमा भएको स्थानीय तह चुनाव अन्तर्गत भरतपुरमा वैशाख ३१ गते मतदान भएको थियो । २७ वटा वडाको मतगणना सकिएर १९ नम्बरको गणना भइरहँदा जेठ १४ गते मध्यरातमा गणनामा बसेका माओवादी प्रतिनिधिहरुले मतपत्र च्यातेका थिए । जसका कारण भरतपुर १९ मा शुक्रबार पुनः  मतदान भएको थियो । १९ को च्यातिएपछि गन्न बाँकी २० नम्बर वडाको पनि गणना भएको थिएन । २० नम्बर वडाको मत पनि आइतबार गणना गरिएको हो ।

पुनः मतदान गरे आफ्नो पक्षमा धेरै मतदान गराउन सकिन्छ भन्ने योजनाका साथ माओवादीले मतपत्र च्यातेको एमालेले आरोप लगाउँदै आएको छ ।

पुनः मतदानबाट कांग्रेस–माओवादी गठबन्धन पक्षधर उम्मेदवारलाई फाइदा पुगेको छ । भरतपुर १९ को मतपत्र च्यातिएपछि कांग्रेस–माओवादी गठबन्धनले संयुक्त रुपमा चुनाव प्रचारप्रसार गरेर अभियान नै चलाएका थिए । उनीहरुले केन्द्रीय नेताहरु वडामा लगेर गठबन्धनमा मतदान गर्न आव्हान गरेका थिए ।

पुनः मतदानअघिको अवस्था

कुल २९ वटा वडा रहेको भरतपुरमा २७ वटा वडाका मत गनेर नतिजा घोषणा भएको थियो । जसअनुसार मेयरमा एमालेका ज्ञवाली अगाडि हुनुहुन्थ्यो । उहाँले कुल ४० हजार ९८० र दाहालले ४० हजार १९६ मत ल्याउनुभएको थियो । मत गन्न १९ र २० नम्बर वडा मात्रै बाँकी थिए । वडा नं. १९ मा मेयरमा दाहालले राम्रो मत ल्याउने अपेक्षा थियो । दाहाल ज्ञवालीभन्दा ७८४ मतले पछाडि हुनुहुन्थ्यो ।

१९ को गणना सकिँदा यो अन्तर तीन सयदेखि पाँच सयसम्म भए २० नम्बरको मत गन्दा दाहालले ज्ञवालीलाई जित्ने सम्भावना प्रबल हुन्थ्यो । तर, १९ को मत गन्न थालेपछि गठबन्धनले सोचेअनुरुप मत आएन । मतपत्र च्यातिनुअघि वडा नं. १९ का एक हजार ८०९ मतगणना भएको थियो । जसबाट ज्ञवालीको कुल मत ४१ हजार ६४१ र दाहालको मत ४० हजार ९०८ पुग्यो । दाहाल र ज्ञवालीबीच मतान्तर ७३३ मात्रै रह्यो । यो वडामा मत अनुपातका आधारमा गणना सकिँदा ज्ञवाली दाहालभन्दा ६०० भन्दा बढी मतले अगाडि हुने सम्भावना थियो । यसले गर्दा वडा नंं २० को गणनापछि ज्ञवालीले नै जित्ने बलियो सम्भावना थियो ।

पहिलेको मतदानमा दाहाललाई मत नहालेका कांग्रेस समर्थक मतदातालाई पुनः मतदान हुँदा पक्षमा मतदान गरेका छन् । जसले गर्दा उहाँलाई चुनाव जित्न सहज भयो । पुनः मतदान नभई गणना भएको भए ज्ञवालीले जित्ने पक्का थियो । कतिपयले यस चुनावलाई पुष्पकमल दाहालले सिराहामा निर्वाचन जितेकै शैली भनेका छन् भने कतिपयले प्रचण्डको छोरीलाई जसरी पनि चुनाव जिताउने रवैयाका कारण यो अवस्था सिर्जना भएको बताएका छन् ।