पूर्व डिआइजी रञ्जन कोइरालालाई जेलमा लिन पुगेकी महिला को हुन्

पत्नी हत्यामा दोषी ठहर भई जेल सजाय भोग्दै आएका पूर्व डिआइजी रञ्जन कोइराला आज थुनामुक्त भए । दाह्री पालेका रञ्जनले थुनाबाट निस्कँदा मुखमा मास्क लगाएका थिए । उनलाई लिन कालो रङ्गको कारमा सेतो बुट्टेदार पोशाकमा एकजना महिला पुगेकी थिइन् ।

महिलाले मुखमा मास्क लगाएकी थिइन् । अधवैंशे महिला उनको प्रेमिका भएको बुझिएको छ । रञ्जन थुनामा बसेको साँढे आठ वर्ष ती महिला पुगिरहन्थिन् ।

पत्नी गीता ढकालको हत्यापछि रञ्जनलाई जिल्ला अदालत र पुनरावेदन अदालतले जन्मकैद फैसला सुनाएकोमा सर्वोच्च अदालतले घटाएर ८ वर्ष ६ महिनामा झारेको थियो । उनले साँढे ११ वर्ष कैद छुट पाएपछि छिट्टै थुनामुक्त हुन पाएका हुन् । यसबारे धेरैको चासो परेको छ । पत्नी हत्याका दोषीलाई कैद सजाय घटाउने अदालतको फैसलाको समेत आलोचना भइरहेको छ ।

साँढे ८ वर्ष अघि तत्कालिन सशस्त्र प्रहरी बलका डिआइजी रञ्जन कोइरालाले पत्नी गीता ढकालको हत्या गरी शव मकवानपुरमा लगेर जलाएर जङ्गलमा फालिदिएका थिए । उनको घरायसी विवाद भइरहने गरेको खुलेको छ । सशस्त्रको आइजीपी बन्ने लाइनमा हुँदा तत्कालिन डिआइजी रञ्जनको करिअर नै समाप्त भएको थियो ।