पोखरामा ट्याक्सी चालकहरुको आन्दोलनमा प्रहरीको हस्तक्षेप

पोखरा, २६ पुस । आन्दोलनमा उत्रिएका पोखराका ट्याक्सी चालकको आन्दोलनमा प्रहरीले हस्तक्षेप गरेको छ । मनलाग्दी भाडा असुल गर्दै आएका ट्याक्सी चालकहरुलाई प्रहरीले कारवाही गर्न थालेपछि त्यसको विरोधमा आन्दोलनमा उत्रिएका ट्याक्सी चालकहरुको आन्दोलनमा प्रहरीले हस्तक्षेप गरेको हो ।

मुख्य चोकमा ट्याक्सी पार्किङ गरी सडक जाम गराइएकोमा ट्याक्सीलाई प्रहरीले धकेलेर सडक किनारामा लगाएर यातायात सञ्चालन गरेको छ । पोखराको पृथ्वीचोक, चिप्लेढुंगा, सभागृहचोक लगायतका मुख्य चोकमा ट्याक्सी पार्किङ गरेर ट्याक्सी चालकहरु आन्दोलनमा उत्रिएका थिए ।

कास्कीका प्रहरी प्रमुख प्रहरी उपरीक्षक अशोक सिंहको कमाण्डमा प्रहरी टोली पुगेपछि आन्दोलनकारी ट्याक्सी चालकहरुबीच भागाभाग मच्चिएको थियो । सिभिल पोशाकका प्रहरीले मंगलवार ट्याक्सीमा चढ्दै बढी असुल्ने ट्याक्सी चालकलाई पक्राउ परेको थियो । त्यसको विरोधमा ट्याक्सी व्यवसायी समिति पोखराको नेतृत्वमा व्यवसायी तथा चालक आन्दोलनमा उत्रिएका हुन् ।