प्रकाशको स्मृतिमा बिहीबार शोकसभा, काजक्रिया नहुने

काठमाडौं, ६ मंसिर। नेकपा माओवादी केन्द्रले अध्यक्ष पुष्पकमल दाहाल प्रचण्डका पुत्र तथा पोलिटब्युरो सदस्य प्रकाशको स्मृतिमा बिहीबार शोभसभा आयोजना गर्ने भएको छ।

दाहाल निवास लाजिम्पाटमा सो कार्यक्रम आयोजना हुनेछ। चुनावीसभामा भाग लिन चितवन पुगेका दाहाल परिवार बुधबार नै राजधानी फर्किने कार्यक्रम रहेको छ। बिहीबार शोकसभा हुने भएपनि वैदिक विधिअनुसार १३ दिनको काजक्रिया भने हुने छैन।

दाहालका एक मात्रै छोरा प्रकाशको आइतबार बिहान सुतेको स्थानमा आकस्मिक हृदयघातको कारण निधन भएको थियो। उनको आइतबार नै पशुपति आर्यघाटमा अन्त्येष्टी गरिइएको थियो।

यसैबीच नेकपा माओवादी केन्द्रका अध्यक्ष पुष्पकमल दाहाल प्रचण्डले अगामी दस वर्ष देशको विकास र समृद्धिमा विताउने प्रतिवद्धता व्यक्त गरेका छन् ।

चितवनस्थित निवासमा छोरा प्रकाशको स्मृतिमा बुधबार बिहान आयोजित कार्यक्रमलाई सम्बोधन गर्दै दाहालले पहिलो दस वर्ष लडाइ र परिवर्तनमा वितेको बताए ।

निकै भावुक मुद्रामा रहेका प्रचण्डले सामाजिक न्याय र समानताका निम्ति नै चितवन आएको स्पष्ट पारे। ‘१० वर्ष युद्ध लडेँ। अबको १० वर्ष विकासमा लाग्छु,’ उनले भने, ‘यो संकल्प पूरा गर्न आम चितवनवासीको हृद्धयदेखि सहयोग हुने अपेक्षा समेत लिएको छु।’

पुत्रशोकको अवस्था सबैबाट प्राप्त समवेदना, साहनुभूतिका लागि उनले धन्यवाद  प्रकट गरे। उनका साथमा पत्नी सीता, बुहारी बिनासमेत छन्।

(https://colorreflections.com/)