प्रचण्डको रोजाईमा प्रदेश ४ को सभामुखमा लेखबहादुर

काठमाडौं, माघ १९ । प्रदेश ४ मा लेखबहादुर थापामगर सभामुख बन्ने सम्भावना देखिएको छ । वाम गठबन्धनबीच मुख्यमन्त्री एमालेले र सभामुख माओवादीले राख्ने सहमति भइसकेको छ । उपसभामुख एमालेले राख्नेछ ।

सभामुखमा गोरखाबाट निर्वाचित लेखबहादुर थापामगरलाई माओवादीले अघि सार्ने सम्भावना छ । पर्वतका नेत्रनाथ अधिकारी, स्याङ्जाका दीपक थापा दाबेदार भए पनि उनीहरुले बाहिर इच्छा व्यक्त गरेका छैनन्, तर तनहुँका आशा कोइरालाले भने दावी नै गरेकी छन् ।

नेकपा माओवादी केन्द्रका पोलिटब्यूरो सदस्य एवं नेता लेखबहादुर थापामगर गोरखा ‘क’बाट प्रदेशसभाको निर्वाचनमा निर्वाचित भएका हुन् । ‘माओवादीले सभामुख कसलाई बनाउने भन्ने निर्णय अझै गरिसकेको छैन । तर, पार्टीभित्र थामागरकै चर्चा बढी छ,’ प्रदेश संयोजक हरि अधिकारीले जानकारी दिए ।

स्रोतका अनुसार कोइरालाको नाम चर्चामा रहेता पनि पार्टी अध्यक्ष प्रचण्ड भने लेखबहादुर थापामगरलाई बनाउने पक्षमा छन् ।

त्यसैगरि स्याङजाका दीपक थापा भने महिला, जनजातिको कुरा सधैँ उठाएर सार्वभौम संसदले नेता चयन गर्ने अधिकार खोस्न नहुने पक्षमा छन् । दुईबीच एकले अर्कालाई नस्विकार्ने हुँदा प्रचण्ड भने कार्यक्षमता, निरन्तरता र अनुभवि भएकै कारणले पनि लेखबहादुर थापामगरलाई सभामुख बनाउन कस्सिएका हुन् ।

आशा कोइरालाले महिलाको नाममा धेरै पटक अवसर लिएकाले यसपाली उनलाई कुनै पनि हालतमा नस्विकार्ने पक्षमा रहेको संयोजक अधिकारीले बताए । मन्त्री भइसकेकी कोइराला पदको लागि मात्र ठाउँमा पुगने गरेको उनले बताए । महिला प्रतिनिधित्वको विषय उठाएर कोइरालाको दौडधुप पनि सुरु भएको छ ।

निकै शालीन र भद्र नेता समेत रहेका थापामगर पार्टीमा निर्विवादित नेताको रूपमा चिनिन्छन् । माओवादीको जिल्ला, प्रदेश र केन्द्रीय विभागका विभिन्न पदहरुमा बसेर काम गरिसकेको अनुभव उनीसँग छ ।

यता कांग्रेसले प्रदेश ४ मा सभामुख वा उपसभामुख पदका लागि पार्टीबाट उम्मेदवार बनाउने वा नबनाउनेबारे अहिलेसम्म छलफल नै गरेको छैन ।

प्रदेश ४ को प्रदेशसभामा प्रत्यक्ष निर्वाचित हुने जम्मा सिट ३६ रहेकोमा एमाले एक्लै १८ सिटमा विजयी भएको छ । माओवादी केन्द्र ९, नेपाली कांग्रेस ५, राष्ट्रिय जनमोर्चा २, नयाँ शक्ति पार्टी १ सिटमा विजयी भएको छ ।