प्रदेश प्रमुखमा नेता महन्थ ठाकुरका सम्धिदेखि सिएनएनका हिरोसम्म
सारांश
- काठमाडौं, ३ माघ ।
- सरकारले आफ्नो तीब्र आलोचना भइरहँदा ढिलै भए पनि सात प्रदेशका प्रमुखहरु नियुक्त गरेको छ ।
- बुधवार मन्त्रिपरिषद्ले नियुक्त गरेका प्रदेश प्रमुखमा नेताका सम्धि, कांग्रेसका नवप्रवेशीदेखि सिएनएन हिरो बनेका व्यक्तित्वहरु समेत छन् ।
काठमाडौं, ३ माघ । सरकारले आफ्नो तीब्र आलोचना भइरहँदा ढिलै भए पनि सात प्रदेशका प्रमुखहरु नियुक्त गरेको छ । बुधवार मन्त्रिपरिषद्ले नियुक्त गरेका प्रदेश प्रमुखमा नेताका सम्धि, कांग्रेसका नवप्रवेशीदेखि सिएनएन हिरो बनेका व्यक्तित्वहरु समेत छन् ।
नेपाल कम्युनिष्ट पार्टी (एमाले) र माओवादी केन्द्रलाई बाहिरै राखेर प्रदेश प्रमुखहरुको नियुक्ति गरिएको छ । एकजना मधेसी नेताका सम्धिबाहेक नेपाली कांग्रेसले एकलौटीरुपमा प्रदेश प्रमुख बनाएको छ ।
को हुन् प्रदेश प्रमुखमा नियुक्त हुने भाग्यमानीहरु ?
प्रदेश नम्बर १
प्रदेश १ को प्रमुखमा डा. गोविन्द तुम्बाहाङ (सुब्बा) नियुक्त भएका छन् । उनी कांग्रेसका कार्यकर्ता नै हुन् । पञ्चायतकालमा तत्कालीन नेकपा मालेनिकट अनेरास्ववियूका कार्यकर्ता थिए । बहुदल आइसकेपछि उनी कांग्रेसमा प्रवेश गरेका हुन् । २०४९ सालको स्थानीय चुनावमा धरानको प्रमुखमा कांग्रेसबाट उम्मेदवारी दिएका सुब्बा २ सय २५ मतले पराजित भएका थिए । चुनावमा पराजित भएपछि प्राध्यापन पेशामै फर्किएका डा. सुब्बा सिनासका प्रोफेसर हुन् ।
प्रदेश नं. २
प्रदेश २ को प्रमुख बनेका रत्नेश्वर लाल कायस्थ पूर्वप्रशासक हुन् । उनी संघीय फोरमका सचिव पनि हुन् ।
प्रदेश नं. ३
प्रदेश ३ को प्रमुख बनेकी अनुराधा कोइराला माइती नेपालकी संस्थापक हुन् । सन् २०१० मा सीएनएन हिरोको उपाधि जित्न सफल भएकी अनुराधाले भारत सरकारबाट पद्मश्री सम्मानसमेत पाएकी छिन् । कोइराला चुनावको पूर्वसन्ध्यामा मात्रै प्रधानमन्त्री शेरबहादुर देउवाको पहलमा नेपाली कांग्रेस प्रवेश गरेकी थिइन् ।
प्रदेश नं. ४
प्रदेश ४ को प्रमुख बनेका बाबुराम कुँवर पूर्वमहान्यायाधिवक्ता हुन् । कांग्रेसकै कानुन व्यवसायीहरुको संगठन डेमोक्रेटिल लयर्स एशोसिएसनका पूर्वअध्यक्ष कुँवर सुशील कोइराला सरकारको पालामा कानूनी सल्लाहकार महान्यायाधिवक्ता बनेका थिए ।
प्रदेश नं. ५
प्रदेश ५ का प्रदेश प्रमुख बनेका उमाकान्त झा पूर्वसचिव एवं खिलराज रेग्मी सरकारका मन्त्री हुन् । उनी राजपा नेपालका अध्यक्ष मण्डलका संयोजक महन्थ ठाकुरका सम्धि हुन् ।
प्रदेश नं. ६
प्रदेश ६ को प्रमुख नियुक्त भएका सुर्खेतका दुर्गाकेशर खनाल कांग्रेसका पुराना नेता हुन् ।
प्रदेश नं. ७
प्रदेश ७ का प्रमुख बनाइएका मोहनराज मल्ल पूर्व राष्ट्रिय पञ्चायत सदस्य हुन् । मल्ल केही समयअघि मात्र कांग्रेसमा प्रवेश गरेका थिए ।
प्रतिक्रिया