प्रदेश सरकारले छुट्टै खेलुकद विकास समिति गठन गर्ने केन्द्र सरकारलाइ चेतावनी

सप्तरी,१३ साउन।  प्रदेश २ का सामाजिक विकास मन्त्री नवल किशोर साहले खेलकुद क्षेत्रलाई केन्द्र सरकारले सहयोगको हात नवढाए एक दुई साता भित्रै प्रदेश सरकारले छुट्टै प्रादेशिक र जिल्ला खेलकुद विकास समिति निर्माण गर्ने चेतावनी दिएका छन्। नेपाल पत्रकार महासंघ सप्तरीको सभाकक्षमा स्थानीय नटखट दैनिक पत्रिकाद्वारा आयोजना गरिएको सम्मान तथा पुरस्कार वितरण सामारोहलाई सम्बोधन गर्दै मन्त्री साहले सरकारले खेलकुदको विकासलाई प्राथमिकतामा नराखेको गुनासो गर्दै यस्तो चेतावनी दिएका हुन् । खेलकुद समेत गाभिएर वनेको सामाजिक विकास मन्त्रालयलाई केन्द्र सरकारले पर्याप्त वजेट उपलब्ध नगराउँदा चाहे जतिको विकास गर्न नसकिएको उनले बताए ।

एक अर्को प्रसङ्गमा मन्त्री साहले मधेशका कृषकहरु सिचाई र मलको अभावमा खेतीपाति गर्न निकै समस्या भोगिरहेको बेला यस सम्बन्धमा केन्द्र सरकार उदासिन रहेको आरोप लगाए ।
कार्यक्रम संयोजक एवम् खेलकुद पत्रकार मञ्च सप्तरीका अध्यक्ष मनोजकुमार माझीको अध्यक्षतामा आयोजित पुरस्कार वितरण समारोहमा राजविराज नगरपालिकाका मेयर शम्भु यादव, उद्योग वाणिज्य संघका वरिष्ठ उपाध्यक्ष शंकर दास, निर्माण ब्यवसायी संघका अध्यक्ष रामअशिष साह, वरिष्ठ पत्रकारद्वय अनिलकुमार अनल, शिवहरी भट्टराई, पत्रकार महासंघका उपाध्यक्ष श्यामसुन्दर यादव, नटखट दैनिकका प्रकाशक सुखराम यादव, सम्पादक देवराम यादव लगायतले पनि आआफ्नो धारणा राखेका थिए ।