प्रधानन्यायाधीशमा चोलेन्द्रशम्शेर जबराको नाम सिफारिस

काठमाडौं, २७ मंसिर ।  संवैधानिक परिषदले प्रधानन्यायाधीशमा चोलेन्द्रशमशेर जबरालाई सिफारिस गरेको छ।  संवैधानिक परिषदको बिहीबार बिहान सिंहदरबारस्थित प्रधानमन्त्री तथा मन्त्रिपरिषद कार्यालयमा बसेको बैठकले सर्वोच्च अदालतका वरिष्ठतम् न्यायाधिश मध्येबाट जबराको नाम प्रधानन्यायाधीशमा सिफारिस गरेको हो। प्रधानन्यायाधीशमा चोलेन्द्र शमशेर जबराको नाम सर्वसम्मतिले सिफारिस गर्ने निर्णय गरिएको राष्ट्रियसभाका अध्यक्ष एवम् परिषदका सदस्य गणेशप्रसाद तिमिल्सिनाले जानकारी दिए।

सर्वोच्च अदालतको दोस्रो वरियतामा रहनु भएका वरिष्ठ न्यायाधिश दिपकराज जोशी यस अघि नै संसदीय सुनुवाई समितिले अस्विकृत गरेपछि तेस्रो वरियताका वरिष्ठ न्यायाधीश जबरालाई प्रधानन्यायाधिशमा सिफारिस गरिएको छ। २०१४ साल मंसीर २८ गते काठमाडौंको सुकेधारामा जन्मिएका जबराले २०७१ सालदेखि सर्वोच्च अदालतको न्यायाधीशको जिम्मेवारी सम्हाल्दै आएका छन्। प्रधानन्यायाधीश ओमप्रकाश मिश्रले उमेर हदका कारण आगामी पुस १७ गतेबाट अवकाश पाउँदैछन्। संवैधानिक परिषद्ले प्रधानन्यायाधीश नियुक्तीका लागि सिफारिस गरेका जबरालाई संसदीय सुनुवाई विशेष समितिले स्विकृत गरेपछि राष्ट्रपतिले नियुक्त गर्ने संवैधानिक व्यवस्था छ।