प्रहरीलाई दुर्घटना, अपराधबारे जानकारी दिन १०० मा एसएमएस

काठमाडौं । तपाइँलाई कुनैपनि घट्ना, दुर्घटनाको बारेमा जानकारी दिनुपर्ने भएको छ भने प्रहरीले निशुल्क एसएमएस सेवा थालेको छ ।

नेपाल प्रहरीलाई १०० नम्बरमा एसएमएस गरी दुर्घटना, अपराध लगायत विषयमा जानकारी दिन सकिने भएको छ । यसअघि फोन १०० नम्बरमा फोन मात्रै गर्न सकिने व्यवस्था रहेको थियो । महानरीय प्रहरी दिवसको अवसर पारी प्रहरीले आइतबारदेखि ‘एसएमएस सेवा’ थालेको हो ।

निशुल्क एसएमएस सेवाले अपराध नियन्त्रणका लागि सूचना लिन सहज हुने विश्वास प्रहरीले व्यक्त गरेको छ । निमित्त प्रहरी महानिरीक्षक पुस्कर कार्कीले १३ औँ महानगरीय प्रहरी दिवसको अवसर पारेर एसएमएस सेवाको सुरुवात गरेका हुन् ।

कार्यक्रममा राम्रो काम गर्ने प्रहरी कर्मचारीलाई प्रशंसापत्र दिइएको थियो । त्यसैगरी सहयोग पुर्याउनेलाई कदरपत्र र नेपाल पुलिस स्कुल सामाखुसीमा अध्ययनरत छात्रछात्रालाई छात्रवृत्ति रकम वितरण गरिएको थियो ।