बाम गठबन्धनका उम्मेदवार वलीमाथि नेपाली काँग्रेसका कार्यकर्ताहरुले आक्रमण !

दाङ, मंसिर २० । दाङमा बाम गठबन्धनका उम्मेदवारमाथि नेपाली काँग्रेसका कार्यकर्ताहरुले आक्रमण गरेका छन् । दाङ निर्वाचन क्षेत्र नं. ३ प्रदेश सभा सदस्य पदका लागि बाम गठबन्धनका उम्मेदवार उत्तरकुमार वलीमाथि बुधबार बेलुका नेपाली काँग्रेसका कार्यकर्ताहरुले आक्रमण गरेका हुन् । आफ्नो निर्वाचन क्षेत्रबाट तुलसीपुरतर्फ आउँदै गर्दा उम्मेदवार वलीमाथि आक्रमण भएको हो । साथै वली चढेको गाडी तोडफोड भएको छ ।

गाडीको शिशा फुटाइएको छ । तुलसीपुरको भ्यूडर सुनपुर भन्ने स्थानमा गाडी रोकेर कांग्रेस कार्यकर्ताले वलीमाथि हातपात गरेका हुन्, भने गाडीमा ढुंगा प्रहार समेत गरेका छन् । यसैबीच आक्रमणको घटनाप्रति उम्मेदवार वलीले खेद प्रकट गर्नुभएको छ । नेपाली काँग्रेसको हार मानसिकताका कारण आफूमाथि आक्रमण भएको भन्दै वलीले प्रशासनलाई तत्काल घटनाको छानबिनका लागि आग्रह गर्नुभएको छ । त्यस्तै नेकपा एमालेका जिल्ला अध्यक्ष टीकाराम खड्काले उम्मेदवारहरुको सुरक्षाको व्यवस्था मिलाई दिन आग्रह गर्नुभएको छ ।

उम्मेदवारमाथि आक्रमण हुनु लोकतन्त्रमाथिको आक्रमण भएको भन्दै अध्यक्ष खड्काले निर्वाचनको अघिल्लो दिन नियोजित रुपमा आक्रमण हुनु काँग्रेसको हार मनोबृत्ती भएको बताउनुभयो । प्रहरी प्रशासनको बलमा उम्मेदवारमाथि कांग्रेसले नियोजित तरिकाले आक्रमण गरेको भन्दै यस खालका घटना नरोकिए एमालेले कडा प्रतिवाद गर्ने अध्यक्ष खड्काले बताउनुभयो ।