ब्राजीलको जेलमा ग्याङ फाइट हुँदा ५२ कैदीको मृत्यु

बीबीसी। ब्राजीलको पारा राज्यको एउटा जेलमा दुई गुटबीच भएको झडपमा परी कम्तिमा पनि ५२ जना कैदीको मृत्यु भएको छ।अधिकारीहरुका अनुसार अल्टामीरा जेलमा करिव पाँच घण्टासम्म ग्याङ फाइट भएको थियो। स्थानीय संचारमाध्यमका अनुसार जेलका एक भागका कैदी अर्को भागमा पुग्दा दोहोरो झडप भएको थियो। मारिएका मध्ये १६ जनाको शरीरबाट टाउको अलग भएको छ।बीबीसीका अनुसार जेलको एउटा भागमा एक पक्षले आगो लगाउँदा धेरै जनाको धुँवामा निस्सासिएर मृत्यु भएको थियो।

कैदीले जेलका दुई जना अधिकारीलाई बन्धक पनि बनाएका थिए। उनीहरुलाई पछि रिहा गराइएको थियो। कैदीबीचको झडप स्थानीय समय अनुसार विहान सात बजे सुरु भएको थियो, उक्त झडप करिव पाँच घण्टापछि नियन्त्रणमा लिइएको थियो।ब्राजीलका संचारमाध्यमले देखाएको एउटा भिडियोमा एउटा भवनबाट धुँवाको मुस्लो निस्किएको थियो। अन्य भिडियोमा कैदी बन्दी जेलको छतमा आत्तिइरहेको अवस्थमा देखिएका थिए।

जेलमा जुन पक्षबीच झगडा भयो उनीहरुको नाम अहिलेसम्म सार्वजनिक गरिएको छैन। स्थानीय संचारमाध्यमका अनुसार अल्टामीरा जेलमा २०० कैदी राख्ने क्षमता भएपनि त्यहाँ ३११ कैदी थिए। ब्राजीलको जेलमा हिंसाका घटनालाई सामान्य रुपमा लिइन्छ। ब्राजीलका जेलमा करिव सात लाख मानिस बन्दीका रुपमा रहेका छन्। धेरै जसो जेलमा क्षमता भन्दा धेरै कैदी बन्दी छन्। मे महिना एकै दिन फरक फरक जेलमा भएका हिंसाका घटनामा ४० जनाको मृत्यु भएको थियो।