मान्छे मारेर फरार कार चालक एक सातापछि पक्राउ

काठमाडौं । कारको ठक्करले मान्छे मारेर भाग्ने कार चालकलाई प्रहरीले एक सातापछि पक्राउ गरेको छ । महानगरीय प्रहरी परिसर काठमाडौंले मंसिर १२ गते दुर्घटनामा मान्छे मारेर फरार रहेका चालकलाई सोमबार पक्राउ गरेको छ ।

प्रहरीले कञ्चनपुर घर भई कीर्तिपुर बस्ने १९ वर्षीय जीवन सिंहलाई टेकुमा ठक्कर दिई मारेका चालक फरार रहेका थिए । काभ्रेका ३६ वर्षीय चालक कुमार श्रेष्ठलाई उनकै ठाउँबाट प्रहरीले पक्राउ गरेको हो ।

सवारीसाधनको ठक्करबाट मृत्यु भएका सिंह नेपाल प्रहरीका हवल्दार चक्रबहादुर सिंहका छोरा हुन् । चक्रबहादुरको द्वन्द्वकालमा २०५८ सालमा माओवादी आक्रमणबाट अछाम सदरमुकाम मङ्गलसेनमा मृत्यु भएको थियो ।

प्रहरीका अनुसार हत्या गरेर फरार श्रेष्ठलाई बा१५च ३२९३ नम्बरको ओमिनो कार्गो भ्यानसहित काभ्रेबाट पक्राउ गरिएको हो । भ्यान लुकाएर राखेको अवस्थामा पक्राउ गरिएको हो ।