मिस वर्ल्डमा अनुष्कालाई ३ अवार्ड

मिस नेपालले मिस वर्ल्डमा भाग लिन थालेको झण्डै २५ वर्ष पुग्न लाग्यो । तर अहिलेसम्म एक जनाले मात्रै टाइटल अवार्ड पाएकी छन् । तर, यस पटकको मिस नेपाल वर्ल्डमा अनुष्का श्रेष्ठले तीन विद्यामा अवार्ड जितेकी छन् । यसअघि इशानी श्रेष्ठले व्यूटी वीथ अ पर्पस अवार्ड जितेकी थिइन् । तर यस पटक अनुष्काले व्यूटी वीथ अ पर्पस, मल्टिमिडिया र हेड टु हेडगरी तीन विद्यामा उत्कृष्ट अवार्ड पाएकी छन् ।

हिजो लण्डनमा सम्पन्न ६९ औं मिस वर्ल्डमा जमैइकाकी सुन्दरी टोनी एन सिं मिस वर्ल्ड भएकी छन् । त्यस्तै फस्ट रनरअप फ्रान्सकी ओफेली मेजिनो भइन् भने भारतकी सुमन राव सेकेन्ड रनरअप भइन् । नेपालबाट गएकी अनुष्का टप ४० हुदै उनी सेमी फाइनलसम्म पुगिन् । तर फाइनल राउण्डको टप ६ मा भने पर्न सकिनन् । उनी सेमी फाइनल अर्थात उत्कष्ट १२ सम्म पर्नु पनि निक्कै ठूलो सफलता भएको पूर्व मिस नेपाल मलिना जोशीले बताईन् ।

सयभन्दा धेरै देशबाट सहभागी भएका मिसवर्ल्ड प्रतियोगितामा नेपाली प्रतियोगीले नेपाल भ्रमण वर्ष २०२० मा सवैलाई निम्तो दिएकी थिइन् । व्यक्तिगत तथा सामूहिक रुपमा उनले नेपाल भ्रमण वर्षको निम्तो दिएकी थिइन् ।