आज राष्ट्रपतिलाई प्रधानन्यायाधीशले सपथ दिलाउने

काठमाडौं, ३० फागुन- नव निर्वाचित राष्ट्रपति विद्यादेवी भण्डारीको आज बुधबार पद तथा गोपनीयताको सपथ ग्रहण हुँदैछ । वर्तमान राष्ट्रपति समेत रहेकी भण्डारीले हिजो मंगलबार ३९ हजार २७५ मतभार लिएर प्रतिस्पर्धी लक्ष्मी राईलाई पराजित गर्दै निर्वाचित भएकी हुन् । प्रतिस्पर्धी राईले ११७३० मतभार पाएकी छन् ।

संविधान अनुसार प्रधान न्यायाधीशले राष्ट्रपतिलाई सपथ दिलाउनुपर्ने व्यवस्था छ । प्रधान न्यायाधीश गोपाल पराजुलीका विषयमा सार्वजनिक रुपमै विवाद भएपछि कसले सपथ गराउने भन्नेसमेत विवाद बढेको थियो । पराजुलीका विषयमा नागरिकता र शैक्षिक प्रमाणपत्रमा जन्ममितिका विषयमा टिप्पणी भएको हो । तर, तत्कालका लागि सपथ लिने अर्को कुनै विकल्प देखिएको छैन ।

कार्यक्रम अनुसार सोही अनुसार दिउसो ४ बजे प्रधान न्यायाधीश गोपाल पराजुलीले नव निर्वाचित राष्ट्रपति भण्डारीलाई सपथ खुवाउने कार्यक्रम रहेको राष्ट्रपति कार्यालयले जनाएको छ ।

प्रतिनिधिसभा र राष्ट्रियसभा तथा प्रदेशसभाका सांसदहरूको निर्वाचन मण्डलबाट बहुमत प्राप्त गर्ने व्यक्ति निर्वाचित हुने व्यवस्था छ। राष्ट्रपतिको निर्वाचनमा ५२ हजार ५ सय मतभार भएको थियो । राष्ट्रपति निर्वाचनमा संघीय संसद्को मतभार ७९ छ भने प्रादेशिक संसद्को मतभार ४८ रहेको थियो ।