मोरङ क्षेत्र नं ४ को चुनावी रौनक

दोस्रो चरणको निर्वाचनको तिथि जति जति नजकिँदैछ, मोरङमा त्यति त्यति चुनावी सरगर्मी बढ्न थालेको छ ।

निर्वाचनको दिन घट्दै एघार दिनमा सीमित भएपछि उम्मेदवारले मतदातालाई आपूmतिर आकर्षित पार्र्न सबैभन्दा बढी घरदैलो अभियानमा जोड दिएको देखिन्छ । उम्मेदवारले मतदाताका घरघरमा पुगेर मत माग्ने चुनावी रणनीतिलाई पहिलो प्राथमिकतामा राखेका छन् ।

मोरङमा छ प्रतिनिधिसभा निर्वाचन क्षेत्रमध्ये क्षेत्र नं ४ मा पनि चुनावी रौनकमा झन् बढोत्तरी भएको देखिन्छ । सो क्षेत्रमा पनि उम्मेदवार कोणसभाका साथै घरदैलो अभियानमा बढी केन्द्रित भएका छन् ।
सो क्रममा मतदाताका आकांक्षा र जिज्ञासालाई ध्यानपूर्वक ग्रहण गरी समस्या समाधान गर्ने विषयमा उम्मेदवारले प्रतिबद्धता प्रकट गरिरहेको देखिन्छन् ।साथै कार्यकर्तालाई व्यापक रुपमा परिचालन गरी मतदातालाई आकर्षित पार्न पाँचवर्षीय योजना र पार्टीको घोषणापत्रको विषयमा पनि जानकारी गराउने गरिएको देखिन्छ ।

क्षेत्र नं ४ मा नेपाली काँग्रेसका महेश आचार्य र वाम गठबन्धनबाट नेकपा (माओवादी केन्द्र)का अमनलाल मोदीबीच प्रतिस्पर्धा हुने सम्भावना प्रबल छ । आचार्य यसअघि सोही क्षेत्रबाट निर्वाचित हुनुभएको थियो । त्यस्तै माओवादी केन्द्रका मोदी समानुपातिकबाट सभासद् हुनुभएको थियो ।
सो क्षेत्रबाट नौ जना चुनावी प्रतिस्पर्धामा हुनुहुन्छ । राष्ट्रिय जनता पार्टीबाट लक्ष्मण साहु, विवेकशील साझा पार्टीबाट अमलेशकुमार कर्ण, नेमकिपाबाट शालिग्राम राउत, देशभक्त जनगणतान्त्रिक मोर्चाबाट कृष्णकुमार मुडियारी, नयाँ शक्ति पार्टीबाट राकेश चौधरी, एकीकृत राप्रपा(राष्ट्रवादी)बाट महेश्वर कामत र देशभक्त लोकतान्त्रिक पार्टीबाट किरणबहादुर क्षेत्री मैदानमा हुनुहुन्छ ।
उनान्सय हजार १२३ मतदाता रहेको सो क्षेत्रमा ग्रामीण क्षेत्रलाई बढी केन्द्रित गरेर उम्मेदवार प्रचारप्रसारमा जुटेको देखिन्छ । दुई गाउँपालिका कटहरी र ग्रामथानका साथै विराटनगर महानगरपालिकाका १,२,३,८,१० र १९ नं का छ वटा वडा र बेलवारी नगरपालिका का ५,६ र ७ नंका तीन वटा वडाका क्षेत्रका मतदाताले बाटोघाटो, कृषिको आधुनिकीकरणका साथै सिँचाइको समुचित व्यवस्था, सुकुम्वासी समस्याको समाधानलगायत माग उम्मेदवारसमक्ष राखेका छन् ।