यसकारण हिजो राष्ट्रपतिको सवारीमा जाम भएन

सेना दिवसको दिन रात्रीभोजमा राष्ट्रपति विद्यादेवी भण्डारीको सवारीका लागि गरिएको ट्राफिक जाम सर्वसाधारणले अवज्ञा गरेपछि त्यो विषय सामाजिक सञ्जालमा भाइरल बनेको थियो । धेरैले त्यो अवज्ञाको समर्थन गर्दै हाई प्रोफाइल सवारीका कारण सर्वसाधारणले भोग्ने समस्या सधैका लागि समाधान हुनु पर्ने माग राखेका थिए ।

हिजो साँझ संयुक्त राष्ट्रसंघीय आयोगको ६३ औँ अधिवेसनमा सहभागि हुन अमेरिका जाने क्रममा भने राष्ट्रपति भण्डारीको सवारी गराउँदा निकै होसियारी गरिएको थियो । सर्वसाधारणलाई जाममा नफसुन भने उनको सवारीको रुट पनि छोटो बनाइएको थियो । शितल निवासबाट बालुवाटार, ज्ञानेश्वर, गौशला हुँदै राष्ट्रपतिको सवारीलाई विमानस्थलसम्म पुर्याइएको थियो ।

त्यस्तै सवारीको समय एकतर्फी सडक मात्रै राष्ट्रपतिको सवारीलाई छुट्याइएको थियो । सडक एकतर्फ मात्रै रोकिएको, सवारीको रुट छोटो भएको र साँझको समय भएकाले राष्ट्रपतिको हिजोको सवारीले सर्वसाधारणले सास्ती पाएनन् ।

राष्ट्रपति कार्यालय र सवारीको व्यवस्थापन गर्ने निकायले देखाएको यस्तो होसियारीका कारण सर्वसाधारणले दुख नपाएको बुझिएको छ ।

राष्ट्र संघको प्रधान कार्यालयमा फागुन २७ देखि आगामी चैत ८ गतेसम्म आयोजना हुने सो अधिवेशनका क्रममा उनले फागुन २८ गते हुने ‘शक्तिमा नारी’ विषयको उच्चस्तरीय बैठकलाई सम्बोधन गर्नेछिन् । महिला नेत्रीले ‘विश्वलाई कसरी परिवर्तन गर्छन्’ भन्ने विषयमा पनि राष्ट्रपतिले मन्तव्य दिने कार्यक्रम छ ।