यस्ता आरोप लगाउँदै प्रचण्डले दिए प्रधानमन्त्रीलाई सरकारमा नरहेको जानकारी

काठमाडौं, २८ पुस । नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल “प्रचण्ड”ले अहिलेको अवस्थामा सरकारमा रहिरहनु औचित्यपूर्ण नभएको भन्दै आफ्नो पार्टी अब सरकारमा नरहेको जानकारी प्रधानमन्त्री शेरबहादुर देउवालाई गराएका छन् ।

ताजा जनादेश समेत आइसकेको स्थितिमा प्रधानमन्त्रीबाटै नयाँ जनादेश अनुरुपको सरकार गठनका लागि आवश्यक वातावरण बनाउन अबिलम्व पहल हुनेछ भन्ने अपेक्षा राखेकोमा त्यस दिशामा ठोस कदम नचालिएको जानकारी पत्रमा उल्लेख छ । सत्ता हस्तान्तरणमा ढिलासुस्ती भइरहेको, राजश्वको दूरुपयोग र काम चलाउ सरकारले गर्न नमिल्ने अतिरिक्त निर्णयहरु पनि भइरहेको सन्दर्भमा अब सरकारमा रहिरहनु औचित्यपूर्ण नदेखिएको बताउँदै जानकारी पत्रमा भनिएको छ, “आजैबाट हामी ने.क.पा. (माओवादी केन्द्र) र ने.क.पा.(संयुक्त) सम्बद्ध मन्त्रीहरुलाई फिर्ता बोलाई सरकारमा नरहेको जानकारी गराउँदछौं ।”

प्रधानमन्त्रीलाई बुझाइएको जानकारीपत्रको पूर्णपाठ :

सम्माननीय प्रधानमन्त्रीज्यू
प्रधानमन्त्रीको कार्यालय
सिंहदरबार, काठमाडौं ।

विषय : सरकारमा नरहेको जानकारी ।
महोदय,
नेपालको संविधानले अंगिकार गरेको संघीय प्रणाली कार्यान्वयन गर्ने सन्दर्भमा २०७४ असोज २ को स्थानीय तह, मंसिर १० र २१ को प्रदेश तथा प्रतिनिधिसभाको निर्वाचन सम्पन्न गर्ने मूल राजनीतिक कार्यभार पूरा गर्न एउटा विशिष्ट अवस्थामा हाम्रो पार्टी तपाईले नेतृत्व गर्नुभएको सरकारमा सामेल भएको कुरा सर्वविदितै छ । २०७४ असोज १७ गते ने.क.पा. (एमाले) र ने.क.पा. (माओवादी केन्द्र) ले प्रदेश र प्रतिनिधिसभाको निर्वाचनमा वाम गठबन्धन अन्तर्गत मिलेर चुनाव लड्ने र चुनावपछि एउटै पार्टी बनाउने समेतको उद्घोष गरेपछि मुलुकमा नयाँ राजनीतिक धु्रवीकरण पैदा भयो । त्यो स्थितिमा पनि निर्वाचन सम्पन्न गर्न तपाइलाई अप्ठ्यारो नपरोस् र समयमै चुनाव होस् भन्ने उद्देश्यले हाम्रो पार्टी सरकारमा बसेको थियो । अब निर्वाचन सम्पन्न भइसकेको छ । संघीय संरचनाअन्तर्गत प्रदेश, संघ र दुई नम्बर प्रदेशको स्थानीय तहको सफल चुनाव गराएर यो सरकारले ऐतिहासिक महत्वको काम गरेको छ । त्यसका लागि हामीले तपाइलाई वधाई पनि दिइसकेका छौं ।
निर्वाचन सम्पन्न भई ताजा जनादेश समेत आइसकेको स्थितिमा प्रधानमन्त्रीबाटै नयाँ जनादेश अनुरुपको सरकार गठनका लागि आवश्यक वातावरण बनाउन अबिलम्व पहल हुनेछ भन्ने अपेक्षा हामीले राखेका थियौं । तर आजसम्म पनि त्यस दिशामा ठोस कदम नचालिएको, बरु ढिलासुस्ती भइरहेको, राजश्वको दूरुपयोग र काम चलाउ सरकारले गर्न नमिल्ने अतिरिक्त निर्णयहरु पनि भइरहेको सन्दर्भमा अब सरकारमा रहिरहनु औचित्यपूर्ण नदेखिएकाले आजैबाट हामी ने.क.पा. (माओवादी केन्द्र) र ने.क.पा.(संयुक्त) सम्बद्ध मन्त्रीहरुलाई फिर्ता बोलाई सरकारमा नरहेको जानकारी गराउँदछौं । साथै सरकारबाट नयाँ जनादेश अनुसार सत्ता हस्तान्तरणमा सहजीकरणको लोकतान्त्रिक भूमिकाको अपेक्षा गर्दछौं ।
२८ पुस २०७४
…………………………..
पुष्पकमल दाहाल ’प्रचण्ड’
अध्यक्ष
ने.क.पा.(माओवादी केन्द्र)